Памёр генпракурор Гішпаніі, які меўся судзіць лідараў Каталоніі
4- 19.11.2017, 19:56
- 17,632
Хасэ Мануэль Маза раптоўна памёр у Аргентыне.
У Аргентыне раптоўна памёр Генеральны пракурор Гішпаніі Хасэ Мануэль Маза, які павінен быў судзіць лідараў Каталоніі. Пра гэта паведаміў гішпанскі прэм'ер-міністр Марыяна Рахой у сваім Twitter, паведамляе liga.net.
«Генеральны пракурор краіны Хасэ Мануэль Маза памёр. Мае прызнанні і падзяку за жыццё, прысвечанае службе дзяржаве», - напісаў прэм'ер-міністр у Twitter і выказаў спачуванні сям'і, сябрам і калегам нябожчыка.
Генпракурор памёр ва ўзросце 66 гадоў. Выданне El Mundo адзначае, што Маза пакутаваў на інфекцыйнае захворванне. Паводле інфармацыі выдання, яго шпіталізавалі ў бальніцу Буэнас-Айрэса, аднак медыкі не змаглі яго выратаваць.
Хасэ Мануэль Маз прыехаў у Аргентыну для ўдзелу ў Асамблеі пракурораў ібера-амерыканскіх дзяржаў.
Цяпер пад вартай знаходзяцца восем сябраў распушчанага каталонскага ўрада і яшчэ двое лідараў ініцыятыўных груп падчас каталонскага рэферэндуму аб незалежнасці 1 кастрычніка.
Спікерку распушчанага парламента Каталоніі Кармэ Фаркадэль суд вызваліў з-пад варты пад заклад. Ёй забаранілі пакідаць тэрыторыю Гішпаніі.
У той жа час 5 лістапада ў Бэльгіі экс-лідар Каталоніі Карлес Пучдэмон здаўся паліцыі. Суд ўмоўна адпусціў яго і яго паплечнікаў.