Як у Беларусі рабуюць банкі
4- 21.11.2017, 17:39
- 25,672
Хроніка нападаў апошніх пяці гадоў.
У сувязі з узброеным нападам на банк у Магілёве «Салідарнасць» узгадала самыя гучныя і незвычайныя гісторыі.
Напала на абменнік, каб накарміць дзіця
Сакавік 2013 года. Мянчанка спрабавала з нажом абрабаваць абменны пункт на Нямізе ў Менску. Для нападу яна выкарыстала газавы балончык. Налётчыца ўварвалася ў абменнік, калі касірка адчыняла памяшканне. Аднак апошняя не спалохалася і зладзіла супраціў.
Мянчанка ўцякла з месца нападу, але была неўзабаве затрыманая. Праваахоўнікам патлумачыла, што пайшла на такі крок, каб накарміць дзіця.
Рабаванне ў Любані
Красавік 2013 года. Двое мужчын у масках праніклі ў памяшканне банка, збілі міліцыянта, забраўшы яго табельную зброю, звязалі касірку. Налётчыкі вывезлі з банка на інкасатарскай машыне больш за мільярд рублёў, блізу 40 тысяч даляраў і 20 тысяч еўраў. Банкаўскую «Газэль» рабаўнікі спалілі.
Налётчыкамі былі мясцовыя жыхары, сярод іх - сяржант міліцыі, які служыў у Дэпартаменце аховы і нёс службу ў гэтым жа банку.
Рабаванне ў Смалявічах
Люты 2014 года. У аддзяленне аднаго з банкаў у пасёлку Зялёны Бор Смалявіцкага раёна ўварваўся невядомы з абрэзам. Ён стрэліў у дзвярны замок, ступіў у пакой і запатрабаваў грошы.
Неўзабаве налётчыка затрымалі, ім быў неаднаразова судзімы за маёмасныя злачынствы 58-гадовы мужчына.
Напад ў «Шчасці»
Кастрычнік 2014 года. У Менску ў гандлёвым цэнтры «Шчасце» (праспект Незалежнасці) малады чалавек узяў у закладнікі 19-гадовую супрацоўніцу абменнага пункта. Перамовы з налётчыкам не прынеслі выніку і супрацоўнікам «Алмаза» давялося ісці на штурм.
Нападнік быў паранены, ім быў жыхар Мастоўскага раёна Гарадзенскай вобласці 1991 года нараджэння. Пазней ён памёр у шпіталі.
Рабаванне ў Мазыры
Люты 2015 года. Невядомы напаў з нажом на супрацоўніцу банка, ударыў яе па твары і запатрабаваў грошы. Забраўшы ключы ад сэйфа, налётчык адкрыў сэйф, узяў больш за 80 мільёнаў беларускіх рублёў і знік.
Пазней ён быў затрыманы, з выкрадзенага ў яго засталося крыху больш за чвэрць сумы.
Ювелірныя салоны і крамы
Акрамя нападаў на аддзяленні банкаў і абменныя пункты за апошнія пяць гадоў фіксаваліся налёты на ювелірныя салоны і простыя крамы.
Кастрычнік 2013 года. Маладзён напаў з нажом на ювелірны салон у Менску на вуліцы Чкалава. Міліцыя ўзяла краму штурмам.
Хроніка рабаванняў да 2013 года
Кастрычнік 2014 года. 25-гадовы жыхар паселішча Калодзішчы абрабаваў краму ў Воршы, параніўшы пры гэтым з пісталета прадаўца. Пры затрыманні маладзён некалькі разоў стрэліў у супрацоўнікаў міліцыі, але не трапіў.
Ліпень 2015 года. У Смалявіцкім раёне двое ў масках абрабавалі краму. Яны пагражалі прадавачцы нажом і прадметам, падобным да пісталета. Налётчыкі забралі ўтаргаванае і прадукты. Неўзабаве яны былі затрыманыя, імі былі жыхары Жодзіна.