На бюджэт аховы Лукашэнкі можна два гады пільнаваць дамы Трампа і ягонай жонкі

У 2018 годзе ахова дыктатара падаражэе яшчэ на 13%.

Абарона жылля Дональда Трампа каштуе амерыканскім падаткаплатнікам даражэй, чым у свой час ахова дома Абамы, але танней, чым каштуе беларускаму народу ахова Аляксандра Лукашэнкі, піша gazetaby.com.

У адпаведнасці з праектам закона аб рэспубліканскім бюджэце на 2018 год, які прыняла «палата прадстаўнікоў» і ўхваліў «савет рэспублікі», на ахову правадыра Беларусі плануецца выдаць 12,1 мільёна даляраў. Як падлічыла «Радыё Свабода», гэта на 13% больш, чым у мінулым годзе.

Для параўнання: паводле звестак з адкрытых крыніц, абарона дома Барака Абамы ў Кенвудзе каштавала блізу 275 тысяч даляраў на месяц, на абарону дома Трампа сыходзіць амаль удвая больш. Гэта звязана з тым, што жонка і сын Трампа не жывуць у Белым доме, у іх свой пентхаус на Пятай авеню, а ён, адпаведна, павінен быць умацаваны і забяспечвацца аховай і ноч і дзень.

Шляхам няхітрых падлікаў атрымліваецца, што на ахову жылля прэзідэнта ЗША штогод выдаткоўваецца 6,6 млн даляраў, гэта амаль удвая менш за суму, якую плануецца выдаткаваць на год утрымання службы бяспекі правадыра Беларусі.

На жаль, пра тое, у якіх інтэр'ерах жыве правадыр Беларусі, народу невядома. Некалькі гадоў таму Аляксандр Лукашэнка абяцаў запрасіць да сябе дадому журналістаў, каб паказаць, як жыве, паабяцаўшы параіцца з сям'ёй, але пакуль сваё слова не стрымаў. Мабыць, сямейнікі выказаліся супраць. На спробу даведацца, як выглядае Лукашэнка ў хатняй абстаноўцы, пашукавікі паказваюць здымкі, якім ужо чвэрць стагоддзя.