Вайна «ДНР» і «ЛНР»: версіі таго, што адбываецца

Што стаіць за апошнімі падзеямі ў Луганску?

Увага да Луганску прыкаваная з учорашняга вечара, калі з'явілася інфармацыя аб спробе сілавога перавароту і ўцёках верхавода "ЛНР" Ігара Платніцкага ў Расею, а ў Краснадонскім раёне мяжу Украіны перасекла калона расейскай тэхнікі, выяўленая ў цэнтры Луганска. Тое, што адбываецца вымусіла Прэзідэнта Украіны Пятра Парашэнку тэрмінова склікаць Вайсковы кабінет. Сайт LB.ua паспрабаваў сабраць максімум інфармацыі аб тым, што ж адбываецца на акупаванай тэрыторыі.

Платніцкі і Карнэт

Унутраныя супярэчнасці сярод "вярхавіны" і "ЛНР" не навіна – перастрэлкі, падрывы і раптоўныя смерці сталі для акупаванага Данбаса штодзённасцю. Але што цікава, што абвастраецца канфлікт непасрэдна ў Луганску тады, калі стаўленіка Крамля Платніцкага пачынае не задавальняць кіраўніцтва мясцовага "сілавога блока".

Так было з папярэднім начальнікам так званай "народнай міліцыі" Алегам Анашчанкам. Ягоны аўтамабіль узарвалі ў лютым гэтага года, традыцыйна абвінаваціўшы ў тым, што здарылася "ўкраінскую ДРГ". Яшчэ дваіх былых "сілавікоў" – Алега Бугрова ("экс-міністр абароны") і намесніка "камандзіра" "Народнай міліцыяй ЛНР" Віталя Кісялёва – арыштавалі і адправілі пад суд. Першага абвінавацілі ў махлярстве пры закупцы труб, другога – у спробе дзяржаўнага перавароту. Анашчанка, калі верыць інфармацыі ў СМІ, таксама быў абвінавачаны ў намеры зрынуць дзейную "ўлада". Як, зрэшты, і Ігар Карнэт, са звальненнем якога і звязаныя цяперашнія падзеі.

Карнэт узначальваў так званае "МУС ЛНР" з 2014 года. І ўжо ў 2015 годзе пачалося ягонае супрацьстаянне з Платніцкім на глебе ўплыву на нафтавы рынак. Журналісты таксама пагаворваюць пра цікавасць Карнэта да наркатрафіку і кантрабанды. Зрэшты, у актыўную стадыю канфлікт перайшоў толькі восенню 2017 года, калі Ігар Платніцкі публічна выселіў аддзел "МУС" з камяніцы ў цэнтры горада, які той увесь гэты час займаў незаконна, і адправіў адстаўку. А гэтаму папярэднічала публічная "лупцоўка" Карнэта "луганскімі дэпутатамі".

21 лістапада цэнтр Луганска ачапілі ўзброеныя людзі без знакаў адрознення. Сам Карнэт апублікаваў на сайце "МУС ЛНР" заяву з аспрэчваннем сваёй адстаўкі і абвясціў аб арыштах людзей з найбліжэйшага атачэння Платніцкага, кіраўніка "адміністрацыі" Ігара Платніцкага Ірыну Тэйцман, начальніка "урадавай службы бяспекі" "МУС ЛНР" Яўгена Селіверстава і дырэктарку мясцовага тэлеканала Насту Шуркаеву.

"У выніку рэалізаваных "МУС" і "МГБ" "рэспублікі" аператыўна-вышуковых і следчых мерапрыемстваў атрыманы довады датычнасці дырэктара ГТРК "ЛНР" Анастасіі Шуркаевай да дзейнасці ўкраінскіх спецслужбаў", - заявіў Карнэт.

Таксама, з ягоных слоў, устаноўлена дачыненне кіраўніка адміністрацыі "ЛНР" Ірыны Тэйцман, а таксама начальніка "ўрадавай службы бяспекі" МУС "ЛНР" Яўгена Селіверстава да "інсцэніроўкі ў верасні 2016 года дзяржаўнага перавароту ў "ЛНР", у выніку якой загінуў былы "прэм'ер-міністр" Генадзь Цыпкалаў, а згаданы вышэй Віталь Кісялёў прысуджаны да працяглага турэмнага зняволення.

Сам Платніцкі інфармацыю пра арышты зняпраўдзіў.

Грызня сепаратысцкай верхавіны нават справакавала з'яўленне ў Луганску дадатковай расейскай тэхнікі і войскаў, якія прыбылі з суседняй "ДНР". Яе зафіксавалі мясцовыя жыхары. Фотадовады дала і Спецыяльная маніторынгавая місія АБСЕ. Гэта ўстурбавала кіраўніцтва Украіны, быў скліканы Вайсковы кабінет, аднак аб выніках яго пасяджэння на сёння нічога не вядома.

"Зялёныя чалавечкі", акрамя блакавання адміністрацыйных будынкаў, захапілі і мясцовую ТРК, у сувязі з чым у горадзе знік тэлесігнал. Таксама, з некаторай інфармацыі, знікла мабільная сувязь, і пазначыліся праблемы з інтэрнэтам.

Ужо да вечара 21 лістапада з'явілася інфармацыя аб тым, што Платніцкі ўцёк у Расею. Яе пацвердзіў са спасылкай на свае крыніцы дырэктар Дэпартамента камунікацыі МУС Арцём Шаўчэнка.

Аднак ужо сёння, 22 лістапада, "кіраўнік ЛНР" нібыта апублікаваў відэа з працоўнай сустрэчы ў Луганску.

Таксама 22 лістапада з'явілася інфармацыя аб тым, што баевікі Карнэта пры падтрымцы спецназа "ДНР" арыштавалі кіраўнікоў "генеральнай пракуратуры "ЛНР", "генеральнага пракурора ЛНР" Віталя Падабрага і "вайсковага пракурора ЛНР" Сяргея Разно. Паводле інфармацыі данецкага выдання "ОстроВ", супрацоўнікі "пракуратуры", у тым ліку і жанчыны, правялі гэтую ноч у заблакаваным будынку, нікога не адпусцілі дадому. Захоплены і будынак "парламента" так званага "Народнага савета ЛНР".

Версіі таго, што адбываецца

Версія 1 – "аб'яднальная". У святле апошніх падзей загаварылі аб чарговай спробе аб'яднання "ДНР" і "ЛНР". Дэпутат Дзярждумы Канстанцін Затулін назваў такую ідэю магчымай. Але "намеснік камандзіра аператыўным камандаваннем" "ДНР" Эдуард Басурын расейскім "журналістам" заявіў, што "ДНР" ніякім чынам не бярэ ўдзелу ў тым, што адбываецца ў "ЛНР".

"Усё, што ў Луганску – я не ведаю, што там адбываецца, гэта іншая тэрыторыя", – сказаў ён.

У Крамлі гэта каментаваць адмовіліся: прэс-сакратар Пуціна Дзмітрый Пяскоў выдаў толькі чарговую дзяжурную фразу пра тое, што гэта "ўнутраная справа рэспублік".

Версія 2 – "страчаны ўплыў". Прыхільнікі гэтай версіі ўцёкі Платніцкага звязваюць са стратай уплыву ў давераным яму рэгіёне. СМІ пішуць, што апошнім часам ён рэдка бываў у горадзе, ўсё кіраванне на сябе ўзялі кіраўніца ягонай "адміністрацыі" Ірыны Тэйцман і начальнік "урадавай службы бяспекі МУС "ЛНР" Яўген Селіверстаў. Звальненне непажаданага Платніцкаму Карнэта павінна было прайсці ціха і непрыкметна, але ён змог заручыцца сілавой падтрымкай (чыёй менавіта – пытанне адкрытае) і абыграць сітуацыю так, што самому верхаводу "ЛНР" давялося ўцякаць у РФ. Акрамя таго, менавіта арышту Тэйцман і Селіверстава, а таксама гендырэктара мясцовай "дзяржтэлекампаніі" Анастасіі Шуркаевой і патрабаваў Карнет.

Паводле інфармацыі расейскага агенцтва РБК, неафіцыйна Крэмль падтрымаў бок Карнэта. Пры гэтым, Платніцкі не ліквідаваны афіцыйна. І будзе "кіраваць" Луганскам столькі, колькі пажадае Расея, застаючыся намінальным кіраўніком без рэальных паўнамоцтваў.

Версія 3 – "кантрабандная". Дарадца міністра МУС Антон Герашчанка, мяркуе, "супрацьстаянне тэрарыстаў узнікла на глебе дзяльбы заробкаў ад кантрабанды і рабаванняў".

"Адзін тэрарыст, які называе сябе "Міністрам МУС ЛНР", Ігар Карнет не падзяліў "брудныя грошы" ад плыні кантрабанды і рабавання расейскай гуманітаркі з іншым тэрарыстам – ”Жабай” (Ігарам Платніцкім)", – напісаў ён у фэйсбуку.

Версія 4 – "канфлікт спецслужбаў". Аўтар версіі – міністр замежных спраў Украіны Павел Клімкін. Ён уважае гэта не за банальны канфлікт дзвюх груповак, а за бітву "спецслужбаў" РФ, што лішні раз даводзіць, што ўсім у рэгіёне кіруе Масква.

"Мы ўлічваем, што там могуць быць і правакацыі. І вядома, пагроза для цывільнага насельніцтва. Пагроза ўкраінскім грамадзянам, якія там пражываюць. Таму ўчора прайшла вельмі сур'ёзная дыскусія аб магчымых варыянтаў дзеянняў. Я ўчора размаўляў з шэрагам партнёраў з АБСЕ і ЕЗ. Вядома, мы павінны клапаціцца і аб бяспецы СММ АБСЕ. Паколькі, гэтая сітуацыя можа быць выкарыстаная для таго, каб абмежаваць сферу іх дзейнасці. Сітуацыя вельмі сур'ёзная. Мы за ёй сочым. І яна на 101% даводзіць, што усё, што адбываецца на акупаваных тэрыторыях знаходзіцца пад татальным кантролем РФ", – адзначыў Клімкін.