У Заслаўі ўвялі платны праезд для дзяцей, бацькі абураныя

Мясцовым уладам не спадабалася, што дзеці катаюцца ў аўтобусах "проста так".

У рэдакцыю tut.by звярнулася жыхарка Заслаўя Ганна. У мінулую пятніцу яны з сынам-школьнікам ехалі дадому на гарадскім аўтобусе. На гадзінніку было паміж 7-8 вечара. За сябе мама аплаціла, і тут кандуктар папрасіла купіць білет дзіцяці. «Але яму восем гадоў», - запярэчыла Ганна. На што спецыяліст папрасіла яе звярнуць увагу на аб'яву за спінай. А там чорным па беламу: у гарадскім транспарце школьнікі могуць ездзіць бясплатна толькі да 19.00.

Ганна спрачацца не стала і квіток дзіцяці аплаціла.

- У нас у горадзе тры школы, некаторыя дзеці вучацца ў другую змену. А затым, пасля ўрокаў ідуць на секцыі, у гурткі. - кажа суразмоўца. - Усё гэта заканчваецца пазней 19.00. Выходзіць, усім ім, каб даехаць дадому, трэба плаціць.

Сын Ганны таксама вучыцца ў другую змену. Заняткі ў яго заканчваюцца а 18.10. Тройчы на тыдзень у яго да 19.30 трэніроўкі.

- Звычайна трэнер падвозіў яго на аўто, таму мы і не сутыкаліся з такой праблемай, а тут я забірала яго сама, - прадаўжае мама. - Але чаму ў Менску дзеці ва ўсялякі час могуць бясплатна ездзіць на грамадскім транспарце, а ў нашым маленькім гарадку не? Гэта ж не справядліва.

На аўтабазе горада Заслаўя тлумачаць: плаціць або не плаціць вучням за праезд вызначае мясцовая ўлада.

- Менскія дэпутаты вызначылі, што праезд для школьнікаў бясплатны, але так не ўсюды, - тлумачыць пазіцыю арганізацыі Галіна Маліноўская, інжынер пасажырскіх перавозак. - Я тэлефанавала ў Барысаў, у Вілейку, там таксама аплату вучням абмяжоўваюць.

Паводле слоў спецыяліста, правіла плаціць пасля 19.00 дзейнічае ў іх горадзе не першы год. Аб'явы аб гэтым у грамадскім транспарце былі яшчэ ў 2016 годзе.

- У Заслаўі ўсяго тры школы. Мы патэлефанавалі ў кожную і высветлілі, што апошнія ўрокі ў другую змену заканчваюцца а 18.30, - кажа Галіна Маліноўская. - Аўтобус ідзе а 18.48, дзеці на яго паспяваюць і дабіраюцца дадому. А калі яны едуць пазней, то трэба плаціць.

- Але чаму?

- На вуліцы холадна, у аўтобусе цёпла, у выніку мы сутыкнуліся з такой праблемай, што па вечарах дзеці проста так катаюцца ў грамадскім транспарце - дурэюць там, і размалёўваюць салон, - адказвае інжынер пасажырскіх перавозак. - Наогул, калі пільнавацца літары закону, то ў вучня павінна быць даведка, дзе пазначанае месца жыхарства і месца вучобы, каб дзіця дабіралася ў школу і са школы. Нават, калі дзеці едуць у тую ж музыкальную школу, паводле логікі яны павінны плаціць. Але мы ўжо на гэта заплюшчваем вочы, і грошай з іх удзень не патрабуем.

У выходныя, удакладняе спецыяліст, за праезд у грамадскім транспарце Заслаўля вучні павінны плаціць.

Нагадаем, пасля таго як у даведках школьнікаў з'явіліся адрас і фатаграфія, у прэс-службе Міністэрства адукацыі растлумачылі: з 1 верасня да 30 чэрвеня школьнікі могуць бясплатна карыстацца грамадскім транспартам ад дома да месца вучобы і назад. Што ж да іншых маршрутаў, пастанову прымаюць мясцовыя органы ўлады.

Пры гэтым у міністэрстве ўдакладнілі, што дзяцей не абмяжоўваюць толькі праездам ад дома да школы.

- Бо дзеці займаюцца ў секцыях, музычных школах, гуртках - і туды ім таксама трэба дабірацца, - распавядала Людміла Высоцкая, прэс-сакратар Міністэрства адукацыі.