«Чорная пятніца»: беларусы перагрузілі інтэрнэт-крамы
- 24.11.2017, 21:40
- 17,500
Не ўсе правайдэры справіліся з нагрузкамі «чорнай пятніцы».
24 лістапада ва ўсім свеце праходзіць «чорная пятніца»: крамы робяць зніжкі, а пакупнікі змятаюць тавары з паліц. Беларускія інтэрнэт-крамы таксама гэта адчулі - нагрузка на некаторыя пляцоўкі ўзрасла ў разы, піша tut.by.
«Нагрузка ўнутры асобных хмарных сервераў нашых кліентаў вырасла ў 10 і больш разоў, - распавялі прадстаўнікі хостынг-правайдэра hoster.by. - Большасць інтэрнэт-крам сёння працавала на мяжы сваіх магчымасцяў».
Да прыкладу, для аднаго з кліентаў за дзень давялося аператыўна нарошчваць магутнасць працэсара з 8 да 24 ядраў CPU падчас пікавых нагрузак.
Прадстаўнікі правайдэра падкрэслілі, што ні адзін з сайтаў іх кліентаў не «ўпаў». Гэтага ўдалося пазбегнуць дзякуючы хмарнаму хостынгу, які дазваляе аператыўна павялічыць рэсурсы.
Не ўсе правайдэры справіліся з нагрузкамі «чорнай пятніцы». На працягу дня беларускія карыстальнікі скардзіліся на перабоі ў працы некаторых гандлёвых онлайн-пляцовак.