«СтопХам» у Менску: Мужчына стаў на шляху кіроўцы BMW, які ехаў па ходніках

Прынцыповы мянчук паказаў кіроўцу, дзе ягонае месца.

Некаторыя кіроўцы дазваляюць сабе парушаць ПДР, да прыкладу, ехаць па ходніках. Некаторых грамадзян гэта катэгарычна не задавальняе. І яны гатовыя актыўна бараніць сваю пазіцыю. Метад актывістаў расейскага праекта «СтопХам» выкарыстаў пешаход на вуліцы Чарнышэўскага ў Менску, каб паказаць кіроўцу BMW, дзе ягонае месца.

Арыгінал відэа даслаў у рэдакцыю оnliner.by чытач. Ён распавёў, што 2 кастрычніка блізу 17:20 трапіў у невялікі затор на вуліцы Чарнышэўскага побач з пасольствам Румыніі.

- Адзін занадта паспешлівы кіроўца наважыў зрэзаць шлях праз ходнікі. І быў блізкі да сваёй мэты, але сустрэў на шляху прынцыповага грамадзяніна, - распавёў аўтар відэа.

= Маладзён, мяркуючы з відэа, не паводзіў сябе абуральна, а проста стаяў на тратуары, перашкаджаючы тым самым праезду аўтамабіля BMW. Пазней падышла жанчына, аднак дакладна не вядома, на чыім баку яна выступала.

- На відэа, дарэчы, ёсць яшчэ адзін кіроўца, які наважыў зэканоміць час. А ўсе іншыя былі даволі ветлівыя: хтосьці прапусціў аўтамабіль перада мной, іншы кіроўца пусціў у чаргу і мяне. Праезд адрэзка вуліцы Чарнышэўскага ад месца, дзе было знятае відэа, да вуліцы К. Чорнага ў мяне заняў 2-3 хвіліны, так што сэнсу ездзіць па ходніках не было, - дадаў чытач.

Гэта, дарэчы, далёка не першы прыклад актыўных паводзінаў менчукоў у дачыненні да тых кіроўцам, якія займаюць сваімі аўтамабілямі пешаходныя зоны. Улетку сайт Charter97.org пісаў пра раварыста, які ў адзіночку здолеў абараніць ходнікі на праспекце Любімава.