Менчукі абураныя «нерухомасцю» на паркоўцы

Праблема аўтамабіляў, што не эксплуатуюцца, для Менска вельмі актуальная.

Замест таго каб размяшчаць вонкавую рэкламу, прапрацоўваць дызайн, плаціць за рэкламныя плошчы, некаторыя ўжываюць нестандартны спосаб. Возьмем старую машыну - такую, што не шкада і што прадаецца нядорага. Размесцім рэкламу прама на ёй: на кузаве, пад шклом, хоць на даху. І пакінем транспартны сродак на паркоўцы ў людным месцы - спосаб прыцягнуць увагу.

«Нерухомасць»?

Карыстальнік форуму onliner.by з нікам cinv размясціў фатаграфію, якую зрабіў на вуліцы Валгаградскай. «Парковачныя месцы ў дэфіцыце, а на паркоўку паставілі, фактычна, аўтахлам», - скардзіцца чытач.

Аўтахлам ці не - пытанне. На бартах аўтамабіля «Жыгулі» ёсць надпіс: «Нерухомасць». Яе можна было б трактаваць адназначна, калі б не рэклама пад шклом: «Продаж і абмен любых кватэр».

Да таго ж на аўтамабілі ўстаноўленыя актуальныя рэгістрацыйныя знакі, усе колы накачаныя, шкло і люстэркі на месцы. Візуальных прыкмет, якія дазволілі б сумнявацца, што машына знаходзіцца ў працоўным стане, няма.

Пра аўтахлам

Праблема аўтамабіляў, што не эксплуатуюцца, або як іх яшчэ называюць, аўтахламу, для Менска актуальная. Як бы мала месца ні было ў дварах спальных раёнаў, то тут, то там можна ўбачыць кандыдата на ўтылізацыю: аўто на спушчаных колах, з нумарамі старога ўзору, без якіх-небудзь прыкмет нядаўняга выкарыстання.

У 2011 годзе ўвайшоў у дзеянне ўказ Лукашэнкі №348 «Аб мерах арганізацыі збору, захоўванні транспартных сродкаў, што не эксплуатуюцца і іх наступнай утылізацыі». У гэтым дакуменце падаюцца прыкметы неэксплутаванага транспартнага сродку - транспартны сродак, на якім адсутнічаюць элементы, прадугледжаныя яго канструкцыяй (шкло салона, колы, элементы кузава), а таксама іх дэфармацыя альбо вонкава бачныя пашкоджанні, пры наяўнасці якіх забараняецца яго ўдзел у дарожным руху або выключаецца магчымасць яго эксплуатацыі, а таксама транспартны сродак, які не эксплуатуецца больш за шэсць месяцаў з дня заканчэння тэрміну дзеяння дазволу на допуск да ўдзелу ў Дарожным руху і не падтрымліваецца ў належным стане.

Выяўленнем аўтахламу займаюцца мясцовыя выканаўчыя або распарадчыя органы сумесна з ДАІ. У кожным канкрэтным выпадку з уладальнікам аўтамабіля звязваюцца і прапануюць яму альбо прывесці машыну ў належны стан, альбо вывезці яе для ўтылізацыі. Ёсць і яшчэ адзін выхад: аплаціць месца на ахоўнай стаянцы і захоўваць сваю маёмасць там. З гэтага моманту ў аўтаўладальніка ёсць 30 каляндарных дзён на тое, каб развязаць праблему.

Калі гаспадар успамінае пра тое, што ў яго ёсць машына, рамантуе яе і пачынае выкарыстоўваць - пытанні знятыя. Суседзі сумна ўздыхаюць, але нічога не застаецца, як змірыцца.

Аднак здараецца, што машыну сапраўды звозяць. Прычым альбо ўладальнік робіць гэта самастойна ва ўстаноўлены тэрмін і, напрыклад, атрымлівае выплату за металалом, альбо транспартны сродак у адпаведнасці з заканадаўствам адбуксоўваюць на стаянку ў прымусовым парадку і затым ўтылізуюць. Пры гэтым гаспадару машыны выставяць рахунак і за транспарціроўку, і за час, які яго аўто прабудзе на ахоўнай паркоўцы да моманту ўтылізацыі.

Як бачыце, у кожным канкрэтным выпадку прымяняецца індывідуальны падыход, і заўчасна прыпісваць аўтамабіль да аўтахламу, пакуль не прынятае канчатковае рашэння аб яго ўтылізацыі. Нават калі ў машыны дзіўны колер і яна прыпаркаваная ў месцы, якое спадабалася іншаму кіроўцу.