«Сцяна Шчоткінай» увойдзе ў дакументальны фільм пра менскага «ЖЭС-арт»

Сцяна міністаркі працы з надпісам «Гэта я прыдумала падатак на беспрацоўе» ўвойдзе ў фільм рэжысёра Максіма Шведа.

«Сцяна Шчоткінай», на якой увесь 2017 год з'яўляўся сацыяльны стрыт-арт, увойдзе ў дакументальны фільм пра менскае «ЖЭС-арт». Рэжысёр Максім Швед здымае фільм пра Менск як пра галерэйную прастору, дзе аўтарамі твораў мастацтва з'яўляюцца работнікі ЖЭСаў, якія зафарбоўваюць графіці і іншай стрыт-арт, паведамляе euroradio.fm.

«Фільм будзе пра тое, як гэты «фупрэматызм» з'яўляецца, хто зафарбоўвае, пра атмасферу горада і гэтых малюнкаў, - тлумачыць рэжысёр Максім Швед. - Акрамя гэтага, мы здымаем, як у рамках пленэра Захар Кудзін капіюе на палатно створаныя на сценах Менска камунальнымі службамі «творы ЖЭС-арта», а пасля робіць з іх выставу».

ЖЭС-арт - вынік барацьбы камунальнікаў з тэгамі, надпісамі і малюнкамі, калі іх зафарбоўваюць рознакаляровымі прастакутнікамі. Гэта адзін з сімвалаў цэнзуры грамадскай прасторы. У сучасным беларускім мастацтве ён таксама вядомы як «фупрэматызм». Гэта з'ява ўжо даўно прыцягвае ўвагу культуролагаў, гарадскіх даследчыкаў, прафесійных фатографаў і дакументалістаў. Пра «ЖЭС-арт» робяць выставы, пішуць аналітычныя артыкулы, робяць фотапраекты.

«Заўтра, 9 лістапада, будзе адкрыццё выставы Захара Кудзіна» Адкрытае палатно «ў прасторы ОК16 на вуліцы Кастрычніцкай, - працягвае рэжысёр Максім Швед. - Гэтая выстава таксама ўвойдзе ў наш фільм, будзе яе натуральным працягам. На выставу ўваход вольны».

«Сцяна Шчоткінай» стала «сцякаць мірам» у пачатку 2017 года. Спачатку на ёй з'явіўся партрэт тагачаснай міністаркі працы Марыяны Шчоткінай з надпісам «Гэта я прыдумала падатак на беспрацоўе» (адсюль і «сцяна Шчоткінай»). Пасля на ёй з'яўляліся і іншыя графіці, але ўсе яны знішчаліся супрацоўнікамі ЖЭС.