Рэпартаж з цягніка з «Пагоняй»: У нашым сядзенні зручнейшыя, чым у Stadler

Сёння паміж Вільняй і Менскам пачаў курсаваць двухпавярховы цягнік Skoda.

Нізкі паклон электрыфікацыі чыгункі. Дакладней, той яе важнай для айчыны часткі, якая злучае беларускую і літоўскую сталіцы. Паводле плану цяпер з боку Вільні будуць курсаваць двухпавярховыя цягнікі Skoda з трох вагонаў, а з боку Менска - аднапавярховыя Stadler ЭПр з пяццю вагонамі. Сёння дэбютуюць літоўцы. Карэспандэнты Onliner.by сустрэлі ранні нядзельны ранак на вакзале Вільні і селі ў новы цягнік:

«Пробная паездка сімпатычнай Skoda з пафарбаваным у чырвоны колер фасад і «Пагоняй» на «скронях» адбылася 10 кастрычніка. Новы цягнік прыбыў у Менск і прывабіў насельнікаў галоўнага беларускага вакзалу. Праўда, ім даводзілася вяртацца. Таму што тэст праходзіў без пасажыраў.

Поўнамаштабны дэбют быў запланаваны на 10 снежня. 9-га мы адправіліся на ўскраіну Вільні, каб убачыць электрадэпо, у якім жывуць Skoda.

- У сувязі з электрыфікацыяй адцінка паміж Вільняй і Менскам мы набылі тры цягнікі для паездак у вашу сталіцу, - кажа часова выконваючы абавязкі начальніка электрадэпо Станіслаў Лучынскіс. - Адзін атрымалі ў верасні мінулага года. Таму што першапачаткова працэс электрыфікацыі планавалася скончыць раней. Яшчэ два прыехалі да нас сёлета.

Тры новыя цягнікі будуць выкарыстоўвацца толькі для працы на менскім кірунку. Ён інтэнсіўны і прыбытковы.

- Адрозніць цягнікі менскага кірунку ад тых, якія выкарыстоўваюцца ў мясцовым радыусе, вельмі проста. У іх лабавая частка цалкам чырвоная. Што тычыцца салона, то тут ёсць дадатковае купэ для кандуктара. Змантавалі рэкламныя маніторы. На іх паказваецца час, мапа, рэклама. Можна вывесці карцінку з камеры, якая размешчаная напачатку цягніка.

Новыя цягнікі тэставаліся на мясцовых літоўскіх кірунках. Калі прадаўжаць параўноўваць іх з менскімі, то адрозніваецца колькасць пасажыраў. У Skoda ў менскім кірунку 290 чалавек. На маршрутах унутры Літвы пасажыраў больш - 304.

На суседніх шляхах два з трох «менскіх» цягнікоў. Той, што справа на кадры, сёння зробіць два рыўкі ў Беларусь і назад. Skoda здольная развіваць хуткасць да 160 км/г. Але, у прынцыпе, рабіць гэта няма дзе. На менскай дыстанцыі ёсць некалькі адрэзкаў, дзе можна дазволіць 140. Але агулам хуткасць складае 120.

Акрамя двухпавярховага цягніка, ёсць яшчэ адна прынцыповая навінка - першы клас. Там адначасова могуць змясціцца 23 пасажыры.

- У мясцовых літоўскіх цягніках месцы першага класа ёсць ва ўсіх набытых цяпер. Размяшчаюцца ў маторным вагоне на другім паверсе. Пры адпраўленні з Вільні мы робім нумарацыю з хваста цягніка. Атрымліваецца, бізнэс-клас знаходзіцца ў першым вагоне.

Пры куплі на сайце БЧ гэтыя месцы не былі неяк пазначаныя. Ну, акрамя кошту. Квіткі ў першы клас каштавалі 67,50 рубля, у другі - 38,10. Гэта рэйс на 06:15. Для параўнання іншыя сённяшнія.

Ходзім па бізнэс-класу.

- Прыязджалі калегі з Беларусі, сказалі, што сядзенні ў нас зручнейшыя, чым у Stadler. У Skoda кожны вагон паасобку. У Stadler - скразны салон з канца ў канец цягніка. Камусьці плюс, камусьці мінус. Справа густу. Скразны праход аптымальна падыходзіць для аднапавярховага цягніка. У двухпавярховых зрабіць яго больш складана. Хоць, наколькі ведаю, кампанія Talgo, прынамсі, распрацоўвала праект двухпавярховага цягніка са скразным праходам праз абодва паверхі.

У бізнэс-класе больш прасторы. Форма крэслаў зручнейшая, у іх скураная абіўка, знізу рычаг для рэгулявання кута нахілу.

У вагонах сустракаем аўтамат з кавай і яго субрата, які выдае халодныя напоі і закускі.

Для пасажыраў ва ўсім салоне раскладзенае меню. Калі хтосьці чагосьці не зразумее, разабрацца дапаможа кандуктар.

Ёсць Wi-Fi. Спрабуем на сабе. Падключаецца літаральна адразу ж. Можна рабіць сэлфі падчас руху. Лучынскіс кажа, падчас выпрабавальнай паездкі паўстала невялікая праблема. Пасля перасячэння мяжы літоўскі інтэрнэт не пераключыўся на беларускага аператара. Здарылася гэта толькі ў Менску. Праўда, непаладку абяцалі ліквідаваць.

- Чаго мы дакладна не можам выправіць - гэта ўдасканалення сеткі ў Беларусі. Калі сігнал будзе слабым, мы нямоглыя.

У камплектацыі тры вагоны. Дзверы адчыняюцца аўтаматычна і характэрна шыпяць. Унутры ўтульна, чыста і прыемна».