Экспэрт: Нават калі пагражаць расстрэлам на месцы, людзі не пойдуць праходзіць тэхагляд

Чаму дзяржава памыляецца, прымушаючы беларусаў плаціць дарожны падатак.

Аўтамабільны экспэрт Дзмітрый Навіцкі хвостка адказаў чыноўнікам, якія выступаюць за ўзмацненне жорсткасці пакарання за няпройдзены тэхагляд:

- Пайшоў інфармацыйны флёр, калі кажуць, што нядаўняя трагедыя звязаная з тым, што аўтамабіль ехаў без тэхагляду і нібыта таму не змог затармазіць. Гэта трызненне. Гэтаму аўтамабілю ЗІЛ, мяркуючы з фатаграфій, было відавочна больш за 20 гадоў - і кожны аўтаслесар вам пацвердзіць, што такі стары аўтамабіль можа прайсці тэхагляд сёння, а заўтра ў яго адмовяць тармазы.

На думку суразмоўцы, гэта «проста жаданне прыцягнуць рэзананснае ДТЗ да праблемы тэхагляду». Адсюль з'яўляюцца і агучаныя чыноўнікамі лічбы пра тое, што больш за мільён беларусаў ездзіць на аўтамабілях без тэхагляду.

- Мы бачым, што гэта ўжо выкарыстоўваецца як падстава для шырокамаштабнай кампаніі, - падкрэслівае ён. - Але рэальная праблема нашмат шырэйшая: яна ўпіраецца ў дабрабыт грамадзян.

Калі б пры праходжанні тэхагляду не трэба было плаціць дарожны падатак, то відавочна, што колькасць аўтамабіляў з тэхаглядам была б нашмат вышэйшай, упэўнены экспэрт.

- Напрыклад, жыхары вёскі, які мае аўтамабіль УАЗ масай больш за 2 тоны - ён зарабляе 300 рублёў на месяц і фізічна не можа заплаціць гэты падатак, каб у яго яшчэ засталіся грошы пракарміць сям'ю. Гэта проста немагчыма. Таму людзі і не плацяць.

Дзмітрый Навіцкі мяркуе, што гэта не аўтамабільная, а дзяржаўная праблема.

- У іншых краінах ужываецца больш прагрэсіўны спосаб, калі дарожны падатак уключаецца ў кошт бензіну. Калі аўто стаіць у гаражы і не выязджае, які сэнс за яго плаціць? Праблема ў тым, што ў кошт бензіну ўжо закладзены акцыз. Але лепш няхай будуць два падаткі, але не так як цяпер.

Нават калі будуць пагражаць з расстрэлам на месцы, людзі не пойдуць праходзіць тэхагляд. Проста таму, што ў іх няма грошай на гэты падатак, - падсумаваў суразмоўца.