Уладальнікі аграсядзібы на Нарачы: Улада ўстаўляе палкі ў колы

Чыноўнікі хочуць прадаць з аўкцыёну палову зямлі, на якой размешчаны турыстычны аб'ект.

«Замест таго, каб ствараць умовы для развіцця спорту і прапаганды здаровага ладу жыцця, мясцовая ўлада ўстаўляе палкі ў колы тым, хто спрабуе гэта рабіць», — з такой праблемай у рэдакцыю оnliner.by звярнуліся ўладальнікі аграсядзібы «Спортхаўс» на беразе Нарачы. Чыноўнікі Мядзельскага райвыканкама збіраюцца выставіць на аўкцыён палову зямлі, на якой размешчаны турыстычны аб'ект. Уладальнікі сядзібы бачаць у гэтым пагрозу для далейшага існавання ўсяго праекта. У раённай землеўпарадкавальнай службе, у сваю чаргу, мяркуюць, што гэтыя асцярогі моцна перабольшаныя, а неабходнасць аўкцыёну прадыктаваная дзяржаўнымі інтарэсамі: атрыманыя з продажу грошы пойдуць на развіццё вёскі.

Сядзіба «Спортхаўс» у вёсцы Гатавічы размешчаная на двух надзелах. Адзін з іх, дзе стаяць гаспадарскі і гасцявы дамы, а таксама іншыя пабудовы, знаходзіцца ў пажыццёва наследаваным валоданні. Пляц плошчай 23,5 соткі, які прымыкае да яго, у 2002 годзе быў выдзелены сям'і ў часовае карыстанне для вырошчвання сельгаскультур. Цяпер там растуць яблыні і грушы, вінаград, ажына. Зямля выкарыстоўваецца строга па прызначэнні. Гэты другі надзел мясцовыя ўлады і хочуць выставіць на аўкцыён. Падрабязнасцямі канфлікту з чыноўнікамі падзялілася дачка ўладальніка сядзібы Вера Пімчанка:

«У адрозненне ад большасці аграсядзіб, «Спортхаўс» неахвотна прымае гасцей, якія жадаюць проста паляжаць у гамаку. Гэтая аграсядзіба арыентаваная на гасцей, якія любяць актыўны адпачынак. Тут займаюцца такімі экзатычнымі для нашых шырот тыпамі спорту, як кайцінг і віндсёрфінг. Сядзіба працуе з 2002 года, і дзякуючы ёй многія з нашых суайчыннікаў пасябравалі з гэтымі тыпамі спорту. Госці з-за мяжы, асабліва з Расеі, таксама нярэдка бывалі ў «Спортхаўсе».

Аднак ужо ў канцы снежня 2017 года заканчваецца дамова часовага карыстання адным з двух надзелаў, на якім размешчаны «Спортхаўс». Мясцовая ўлада ўжо адмовіла майму бацьку ў магчымасці выкупіць гэты надзел кадастравым коштам альбо падоўжыць дамову. Выканкам даслаў адмову, у якой гаворыцца, што пляц будзе падрыхтаваны для продажу з аўкцыёну. Гэта азначае, што тэрыторыя «Спортхаўса» з 2018 года стане ўдвая меншай і, адпаведна, паўстае пытанне аб магчымасці існавання гэтай аграсядзібы ў прынцыпе, бо, у адрозненне ад гатэляў і вялікіх турыстычных комплексаў, уладальнікі самі жывуць на яе тэрыторыі. Для камфортнага размяшчэння гасцей на тэрыторыі будзе проста недастаткова месца.

Такім чынам, аднаразовую выгаду для мясцовага бюджэту пры продажы гэтага пляцу з аўкцыёну чыноўнікі ставяць вышэй за інтарэсы развіцця турызму і спорту ў краіне, не кажучы ўжо пра інтарэсы грамадзян. Вядома, заўсёды застаецца магчымасць выкупіць пляц праз аўкцыён, але ў такім выпадку ўсе дрэвы, вінаграднік і іншыя шматгадовыя культуры давядзецца спачатку знішчыць. Ды і пры пачатковым кошце, які вылічваецца дзясяткамі тысяч даляраў ЗША, наўрад ці гэта рэальная магчымасць для пенсіянера».

Чырвоным колерам на фота ніжэй выдзелены надзел, які плануюць забраць і выставіць на аўкцыён. Са слоў Веры, калі гэта адбудзецца, знікнуць не толькі сад, але і магчымасць заезду для аўто на тэрыторыю сядзібы. Існуе альтэрнатыўная дарога з боку лесу, аднак зімой яна становіцца практычна непрыдатнай для руху аўтамабіляў.

«Разумеючы, што мы як ніхто зацікаўленыя ў куплі гэтага пляцу, мясцовыя ўлады могуць сфармаваць які заўгодна пачатковы кошт, тым самым змушаючы нас заплаціць круглую суму. Нягледзячы на тое, што гэты надзел з нязручнай планоўкай, не мае выхаду да вады і ні для кога, акрамя нас, рэальнай каштоўнасці не ўяўляе», — мяркуе Вера.

Адвакат Наталля Волкава, якая цяпер займаецца гэтай справай, мяркуе, што ўладальнікі сядзібы маюць законнае права выкупіць пляц без аўкцыёну:

«Усе гэтыя гады людзі выкарыстоўвалі надзел паводле мэтавага прызначэння. Ніякіх парушэнняў з іх боку не было. Сёння ў іх ёсць права набыць зямлю ў прыватную ўласнасць кадастравым коштам, аднак адміністрацыйны рэсурс пазбаўляе іх гэтай магчымасці».

Сітуацыю пракаментаваў начальнік землеўпарадкавальнай службы Мядзельскага райвыканкама Аляксандр Чарняўскі:

«Гэты надзел быў выдадзены ўладальнікам аграсядзібы ў 2002 годзе для вырошчвання сельгаскультур. У 2007 годзе дамова часовага карыстання зямлёй была падоўжаная на 10 гадоў і заканчваецца ў гэтым месяцы. Разумеючы каштоўнасць гэтых 23 сотак (а размешчаныя яны ў вельмі прывабным месцы, практычна ля берага Нарачы і побач са зручным пад'ездам), выканкам прыняў пастанову выставіць пляц на аўкцыён для продажу ў прыватную ўласнасць. З 2013 года ў гэтым пытанні вядзецца перапіска з уладальнікам сядзібы. Справа нават разглядалася ў судзе, які пакінуў у дзеянні пастанову выканкама.

Сёння мы прапануем людзям кампраміс — можам пакінуць ім 6 сотак і тым самым захаваць заезд на пляц і магчымасць паркоўкі аўтамабіля.

Прадаць зямлю кадастравым коштам (прыкладна 1,5 тысячы даляраў) немэтазгодна з пункту гледжання дзяржаўных інтарэсаў. Рынкавы кошт у разы, у дзясяткі разоў вышэйшы. Чатыры гады таму такі ж пляц ля берага Нарачы быў набыты на аўкцыёне за $150 000. Гэтыя грошы ідуць не камусьці ў кішэню, а ў бюджэт, г. зн., на развіццё раёна. Дзякуючы паступленням ад аўкцыёнаў у Гатавічах з'явіўся газ, на вуліцы Цэнтральнай паклалі асфальт».