Патрыёт Зміцер Крамянецкі: Не першы раз выходжу на барацьбу з сістэмай
2- 12.12.2017, 10:36
- 10,914
Актывіст задаволены, што прымусіў адказчыкаў з КДБ «варушыцца».
13 снежня суд Маскоўскага раёна прадоўжыць разглядаць позву былога фігуранта «справы патрыётаў» Дзмітрыя Крамянецкага да Камітэта дзяржаўнай бяспекі. Ён хоча спагнаць з сілавікоў 10 тысяч рублёў, піша palitviazni.info.
Моладзевы актывіст спрабуе спагнаць маральную кампенсацыю з КДБ за свой арышт і знаходжанне ў следчым ізалятары. У рамках крымінальнай справы паводле падазрэння ў арганізацыі масавых беспарадкаў Зміцер Крамянецкі ўтрымліваўся пад вартай у следчым ізалятары 10 дзён.
- Як вядома, пасяджэнне паводле справе павінна было прайсці 6 снежня, аднак у суд не з’явіліся адказнікі - прадстаўнікі КДБ, - распавядае Зміцер. - З чэрвеня я спрабую дамагчыся кампенсацыі, але, як бачым, пакуль нават суд ніяк не можа адбыцца. Следчы камітэт адсылае да КДБ, маўляў, гэта ў іх кампетэнцыі разгляд пытання аб прызнанні права на кампенсацыю. Яшчэ ў верасні звярнуўся да «камітэтчыкаў», але тыя маўчаць, а ў суд наогул не з'яўляюцца. Звычайная справа для нашай «прававой» краіны.
- Якую кампенсацыю вы патрабуеце?
- 10 тысяч рублёў. У гэтай суме ўлічаныя выдаткі на адваката падчас майго знаходжання ў следчым ізалятары, маральная шкода... Але нават калі прызнаюць права на кампенсацыю, то звычайна яе суму вызначае суд. Таму можна ў пазове назваць суму і дзесяць, і трыццаць тысяч рублёў, але атрымаеш столькі, колькі пастановіць суддзя. Калі наогул нешта атрымаеш.
- Не верыце, што можна перамагчы працэс?
- Безумоўна, не веру. Не першы раз я спрабую змагацца з дзяржаўнай сістэмай і цудоўна разумею, як яна працуе. Але ж і гэта таксама трэба. Хай паварушацца...