The Guardian: Трэба снаваць планы наконт Расеі пасля Пуціна

Пуцінізм непазбежна закончыцца.

"Да 1991 года наўрад ці хтосьці стаў бы прарочыць распад СССР, а цяпер амаль ніхто не наважваецца прадказаць канец пуцінізму. Сярод заходніх афіцыйных асоб і экспэртаў, ды і ў самой Расеі, шырока распаўсюджанае перакананне, што Пуцін пратрымаецца яшчэ доўга", - піша калумністка The Guardian Наталі Нугайрэд (пераклад - inopressa.ru).

Разглядаючы два пункты гледжання на будучыню Расеі, Нугайрэд распавядае анекдот: "Расейскі журналіст аднойчы спытаў Барыса Ельцына, як, на ягоную думку, ідуць справы ў краіне. "Добра!"- усклікнуў той. Калі журналіст папрасіў даць больш разгорнуты адказ, Ельцын грымнуў: "Не вельмі добра!"

Раскрываючы адзін з пунктаў гледжання, аўтар артыкула піша: "Расея сёння вядзе вайну ў Сірыі і на Украіне, і гэта новая норма, а не мінулы этап. Расейскае таварыства ўспрыняла ідэі агрэсіўнага нацыяналізму і антызаходнія настроі. Расея не зацікаўленая ў развязанні канфліктных сітуацый і разглядае выкарыстанне сілы як ключавы інструмент у дасягненні замежнапалітычных мэтаў. Яе ВУП складае траціну ад італійскага, яна не здолела дыверсіфікаваць эканоміку, але Пуцін кампенсуе гэта падвышэннем міжнароднага прэстыжу Расеі. Ён адцягвае ўвагу ад слабых месцаў ўнутры Расеі, здабываючы выгады са слабасцяў Захаду, што паглыбіліся з прэзідэнцтвам Трампа. Пуцін у добрай форме і пратрымаецца яшчэ доўга".

З процілеглага пункту гледжання, менш распаўсюджанага, усё гэта недаўгавечна, піша Нугайрэд. "Перад Пуціным стаіць праблема перадачы ўлады ў нафтагазавай дзяржаве са стагнацыйнай эканомікай", адкуль таленавітая моладзь "эмігруе натоўпамі". "Расея асуджаная на заняпад. Кітай, што адраджаецца, цяжка дыхае ёй у патыліцу. Планы Пуціна пра Еўразійскі саюз - пусты гук. Нацыяналізм сябе зжыве. Пуцінізм непазбежна закончыцца", - апісвае журналістка.

Ад выбару пункту гледжання залежыць тое, як паводзіць сябе з Расеяй, паказвае аўтарка артыкула: "калі пуцінізм у яго цяперашняй форме працягне існаваць, Расею трэба стрымліваць", калі ж "пуцінізм паступова пачынае перажываць апошнія канвульсіі, мае сэнс рыхтавацца да важных перамен у Расеі".

У другім выпадку, піша журналістка, Расеі давядзецца "павярнуцца да Еўропы дзеля мадэрнізацыі і стабільнасці", і тады ёй "варта прапанаваць праграму збліжэння з Захадам на жорсткіх умовах, уключаючы поўны вывад войскаў з Украіны, Грузіі і Малдавіі".

"Першы пункт гледжання значна больш рэалістычны. У другой можна выявіць некаторую веру", - адзначае Нугайрэд.