Зміцер Крамянецкі: Мой пазоў - супраць КДБ
4- 13.12.2017, 18:06
- 16,301
«Маладафронтавец» патрабуе маральнай кампенсацыі за час праведзены на Валадарцы.
Актывіст «Маладога фронту» Зміцер Крамянецкі запатрабаваў кампенсацыі маральнай шкоды за час, праведзены ў СІЗА па «справе патрыётаў», піша «Белсат».
Крамянецкі паведаміў, што першапачаткова падаў у суд на сілавікоў і следчых, але пасля, з ягоных слоў, адзіным адказчыкам застаўся КДБ.
Пасяджэнне, якое адбылося сёння ў судзе Маскоўскага раёна Менска - ужо не першае, гэта працяг разгляду скаргаў Крамянецкага, але цяпер як адказчык фігуруе Міністэрства фінансаў. Прынамсі, так указана ў спісе пасяджэнняў.
Як паведамляе карэспандэнт з судовай залі, тут прысутнічаў і прадстаўнік Мінфіна. Ён сцвярджае, што «не бачыць падстаў задаволіць пазоў» Крамянецкага.
«Я наважыў судзіцца, таму што яны закрылі мяне і проста трымалі на Валадарцы амаль 10 дзён, затым справу супраць нас спынілі. Адпаведная пастанова мне прыйшла 2 чэрвеня, тады ж я падаў скаргу на Следчы камітэт. І вось з лета цягнуцца суды. Гэта адбываецца праз бюракратыю: патрабуюць шмат розных дакументаў», - сказаў «маладафронтвец».
Ён адзначыў, што «фактычна гэта пазоў да КДБ», але адказчыкам выступае Мінфін, бо менавіта гэтае ведамства мае паўнамоцтвы выплачваць маральную кампенсацыю.
Коратка выступіў і прадстаўнік КДБ, які таксама быў на судзе.
«Нічога па сутнасці справы ён не казаў, проста заявіў, што КДБ пазоў не падтрымлівае і ўсё», - распавёў Крамянецкі.
Суддзя Анціпчук абвясціў, што пастанова па справе будзе вынесеная заўтра а 9:00.
Актывіста Маладога фронту, актыўнага ўдзельніка абароны Курапатаў Змітра Крамянецкага затрымалі 23 сакавіка і выставілі яму і шэрагу іншых «маладафронтаўцаў» абвінавачванне ў «падрыхтоўцы масавых беспарадкаў».