Уладальнікам прыватных дамоў у Менску прыгатавалі чарговы «сюрпрыз»

Некаторыя сядзібы знясуць раней, чым меркавалася.

Майстэрня генеральнага плана Менска распрацавала новы дакумент, што ўдакладняе планы на знос прыватнага сектара, якія будуць рэалізаваныя да 2020 года. Згодна з імі, найбліжэйшымі двума гадамі ў Менску знясуць 1285 жылых дамоў. Ёсць тэрыторыі сядзібаў, якія дадалі ў планы на хуткі знос, бо так захацеў забудоўшчык, піша realt.by.

Цяпер сталічная сядзібная забудова складаецца з 1560 га зямлі - гэта амаль 20% жылых тэрыторый горада. У прыватным сектары Менска размешчаныя больш за 16 тысяч дамоў, якія насяляюць 108 тысяч жыхароў, а гэта 5,5% насельніцтва горада.

Большасць прыватных дамоў (85%) размяшчаюцца паміж 2-м транспартным кальцом і МКАД. 6% прыватнай забудовы, або 1014 сядзібаў, знаходзяцца на тэрыторыях, не прызначаных для жылля: напрыклад, у ландшафтных, грамадскіх і вытворчых зонах, а таксама паблізу інжынерна-транспартнай інфраструктуры. Істотная частка сядзібаў размешчаная ўсцяж чыгункі, што неспрыяльна адбіваецца на якасці жыцця ў іх. Такія дамы мяркуецца знесці.

Наогул, паводле актуальных планаў развіцця горада блізу 68% прыватнай забудовы мяркуецца захаваць, 9% знесці да 2020 года, 18% - пасля. Яшчэ 5% сядзібаў знаходзяцца ў чырвоных лініях вулічна-дарожнай сеткі, іх будуць зносіць пры неабходнасці.

Калі пераходзіць да канкрэтыкі, да 2020 года знос закране прыватныя дамы, размешчаныя ўздоўж праспекта Дзяржынскага, вуліц Ціміразева, М. Багдановіча, а таксама на тэрыторыі новабудоўлі комплексу «Мінск-Мір» і прылеглай да яго забудовы ля вуліц Аэрадромнай і Жукоўскага. Закране працэс былую вёску Лошыцу, вуліцу Карзюкі, а таксама вуліцу Пятроўшчына, уздоўж якой праектуецца Санкт-Пецярбургскі квартал. Прыватны сектар у Чырвоным Бору (пры вуліцах Акадэміка Вышалескага, Акадэміка Жэбрака і іншых) таксама саступіць месца шматкватэрным дамам. Выбарачны знос прыгатаваны сядзібам у былой вёсцы Сухарава, паведамляюць «Мінск-Навіны».

Некаторыя сядзібы знясуць раней, чым меркавалася, бо забудоўшчык выказаў цікавасць да тэрыторыі, на якой яны размешчаныя. Напрыклад, у Кастрычніцкім раёне побач з маштабнай будоўляй ВК «Мінск-Мір» некаторыя забудоўшчыкі пажадалі асвоіць тэрыторыю, на якой размяшчаецца прыватны сектар. Таму адміністрацыя раёна прапанавала ўключыць паказаны раён у першы этап - да 2020 года, а на іх месцы з'явяцца менскія новабудоўлі.