Дапамога ў беспрацоўі зноў упала

Цяпер яна складае 12 даляраў.

Сярэдняя сума дапамогі на аднаго беспрацоўнага на пачатак лістапада склала 24,87 рубля. Гэта 12,4% ад бюджэту пражытачнага мінімуму ў сярэднім на душу насельніцтва. Для параўнання: на пачатак кастрычніка яна складала 26,6 рубля, піша tut.by.

Нагадаем, у Беларусі неаднаразова гаварылі аб тым, што суму дапамогі ў беспрацоўі могуць павялічыць да бюджэту пражытачнага мінімуму. Павышэнне выплат можа закрануць тых, хто страціў працу праз скарачэнне колькасці або штату работнікаў, ліквідацыі прадпрыемства. Цяпер максімальная сума дапамогі ў беспрацоўі складае 2 базавыя велічыні.

У канцы траўня міністарка працы і сацыяльнай абароны Ірына Касцевіч адзначала, што абмяркоўваецца ўвядзенне так званай страхоўкі ад беспрацоўя, якая дазволіць павялічыць суму дапамог. Да 100% БПМ - для тых, хто трапіў пад скарачэнне або апынуўся на біржы працы пасля ліквідацыі яе арганізацыі, да 50% БПМ - для тых, хто страціў працу па іншых важных прычынах. Міністарка адзначыла тады, што новы дакумент праходзіць узгадненне.

Адзначалася, што страхаванне ад беспрацоўя павялічыць нагрузку на Фонд сацыяльнай абароны насельніцтва. Гэта значыць, што адлічэнні рэальнага сектара ў ФСАН, хутчэй за ўсё, будуць павялічаныя. Ірына Касцевіч тлумачыла тады, што Мінпрацы працуе над пошукам аптымальнага балансу.

Аднак у кастрычніку Ірына Касцевіч паведаміла, што ў Беларусі пакуль не будуць пераглядаць парадак выплаты дапамог у беспрацоўі.