Лёнік Тарасевіч: Альянс Беларусі, Літвы, Польшчы і Украіны - магчымы
3- 5.12.2017, 16:30
- 14,518
Вялікае княства Літоўскае ўжо было такім праектам.
Беларускі мастак Лёнік Тарасевіч, які жыве на Беласточчыне ў Польшчы, атрымаў прэмію імя Ежы Гедройца. Калі беларуская ўзнагарода Гедройца - гэта літаратурная прэмія, то ў Польшчы існуюць дзве такія ўзнагароды - польскай газеты "Rzeczpospolita" і ўніверсітэта Марыі Кюры-Складоўскай. Імі ўзнагароджваюць за прадаўжэнне місіі польскага культурнага і палітычнага дзеяча Ежы Гедройца для аб'яднання народаў былога Вялікага Княства Літоўскага і Рэчы Паспалітай у супольны праект.
Ці магчымы такі альянс Беларусі, Літвы, Польшчы і Украіны, "Еўрарадыё" запыталася ў лаўрэата прэміі газеты "Rzeczpospolita" Лёніка Тарасевіча.
- Такая ідэя існуе. Вялікае княства Літоўскае ўжо было такім праектам. Цяпер усё залежыць ад спраў палітычных, палітыкі дзяржаў, якія ў гэтым зацікаўленыя. Усё магчымае, але патрэбныя грошы, людзі і дзяржавы, якія хацелі б гэта зрабіць.
Мастак мяркуе, што інтэлектуальныя і гаспадарчыя межы паміж Беларуссю і Польшчай ужо не існуюць, справа толькі ў палітычным раздзеле:
- З 1980-1990 гадоў сувязі былі ўжо вельмі блізкія. "Басовішча" іх яшчэ больш узмацніла. Цяпер я з нейкім жахам гляджу, што ёсць яшчэ нейкія межы.
Бо калі гаворка ідзе пра інтэлектуальны свет, для нас, мастакоў, людзей літаратуры і музыкі, гэтая мяжа штучная, яна не існуе. Думаю, што ў гаспадарчай і інтэлектуальнай форме - мяжы няма, яна ёсць толькі ў форме палітычнай.
Ежы Гедройц больш за паўстагоддзя выдаваў у Парыжы штомесячнік "Культура", які стаў сімвалам інтэлектуальнай барацьбы з камунізмам і падзеламі ў Еўропе.