Фермер з-пад Кобрына напалохаў суддзю «чорным плакатам»
8- 6.12.2017, 10:26
- 26,145
Сцяпана Дубчука спыталі ў судзе, чаму ён не выйшаў на плошчу з лозунгам чырвонага колеру.
Суд над вяскоўцам з Кобрынскага раёна Сцяпанам Дубчуком прадоўжыцца 14-га снежня. Сцяпан заявіў пра патрэбу выклікаць у суд сведкаў-чыноўнікаў з райвыканкама.
З іх дапамогай ён збіраецца давесці, што прыйшоў на санкцыянаванае свята з нагоды 100-годдзя кастрычніцкай рэвалюцыі, але быў са сваім плакатам чорнага колеру з надпісам «Зямля - сялянам! Калі?». Пра гэта фермер распавёў racyja.com:
- Суддзя кажа: «Навошта вы чорны лозунг прынеслі?» Я кажу: у кожнага свой густ. Я сказаў, што аплакваў мары сялянства, якія не спраўдзіліся. Жалоба такая - 100 гадоў не даюць зямлю.
Праваабаронца Уладзімір Вялічкін быў здзіўлены, што суддзю усхваляваў колер плаката:
- Сцяпана судзяць за тое, што ён нібыта арганізаваў тое, чаго не арганізоўваў. Суддзя ў канцы сённяшніх пасяджэнняў спытала: «Чаму вы прыйшлі з чорным плакатам? Чаму не з чырвоным?». Тут ёсць такое меркаванне, што з-за чорнага колеру яго палічылі за анархіста.
Са слоў Сцяпана Дубчука, яго не чапалі да з'яўлення паведамлення ў прэсе пра яго выхад з плакатам на плошчу 7-га лістапада. Як толькі з'явіўся матэрыял, участковы адразу папрасіў напісаць тлумачальную, пазней быў складзены пратакол і перададзены ў суд.