Гамяльчук з пісталетам зладзіў «бой» у сваім пад'ездзе

Добраахвотна здаць свой пісталет 30-гадовы гамяльчук не пагадзіўся.

Другога снежня п'яны жыхар гомельскай маласямейнага інтэрнату зладзіў перапалох у сваім пад'ездзе. Сумаваў, паліў з пнеўматычнай копіі пісталета Макарава, палохаў людзей, уцякаў ад АМАПу. Першай у міліцыю патэлефанавала мясцовая пенсіянерка - сусед страляе на лесвіцы, камусьці пагражае... Аб падрабязнасцях гэтай гісторыі onliner.by распавялі ва УУС.

Адзін з жыхароў дома ўбачыў хлопца, які моўчкі сядзеў на прыступках паміж трэцім і чацвёртым паверхамі. Пасля ён п'яны стаў размахваць пісталетам, пагражаць, а пазней пачаў бязладную стральбу металічнымі шарыкамі дыяметрам 4,5 мм.

На месца прыбыў АМАП з адмысловай падрыхтоўкай. Паднімаючыся па лесвіцы, байцы патрабавалі ад стралка спыніць стральбу і здаць зброю. Мужчына, спатыкаючыся, бег уверх. Пры гэтым пакінуў на прыступках куртку. У яе кішэні знайшліся ключы ад кватэры. Супрацоўнікі АМАП падняліся на восьмы паверх і пад прыкрыццём кеўларавага шчыта адкрылі гэтымі ключамі дзверы. Унутры выявіўся здзіўлены стралок. Яго затрымалі.

Добраахвотна выдаць пісталет 30-гадовы гамяльчук не пагадзіўся, сказаў, што не памятае, куды паклаў. Пнеўматычны пісталет знайшлі без ягонай дапамогі.

Паводле папярэдніх звестак, у працэсе «бою» з невядомым спаборнікам мужчына стрэліў не менш за 10 разоў. Сляды ад пуль знойдзеныя на сценах па шляху руху грамадзяніна, разбітыя вокны. Агляд затрыманага паказаў 2,62 праміле алкаголю ў крыві.

Распачатая крымінальная справа за хуліганства з ужываннем прадметаў, якія выкарыстоўваюцца ў якасці зброі.