Парашэнку дапытаюць у судзе паводле справы аб дзяржаўнай здрадзе Януковіча
7- 7.12.2017, 17:43
- 12,293
Таксама ў судзе дапытаюць Арсэна Авакава, Аляксандра Турчынава, Андрэя Парубія і іншых.
Пракуратура мае намер дапытаць на пасяджэнні паводле справы аб дзяржаўнай здрадзе Віктара Януковіча прэзідэнта Украіны Пятра Парашэнку. Пра гэта падчас сённяшняга пасяджэння ў Абалонскім судзе сталіцы заявіў пракурор Руслан Краўчанка, паведамляе 112.ua.
«Прашу выклікаць на судовае пасяджэнне Парашэнку Пятра Аляксеевіча ў якасці сведкі боку абвінавачання. Неабходнасць допыту гэтага сведкі з боку абвінавачання ўзнікла падчас даследавання довадаў на судовым пасяджэнні, якое адбылося 6 снежня 2017 года. Указаны сведка зможа даць паказанні наконт узброенай агрэсіі супраць Украіны з боку органаў дзяржаўнай улады РФ, якая ў далейшым пацягнула анэксію Крыму», - растлумачыў пракурор.
Таксама пракуратура прасіла аб допыце яшчэ шэрагу сведак, сярод якіх кіраўнік МУС Арсэн Авакаў, сакратар РНБА Аляксандр Турчынаў, спікер ВР Андрэй Парубій і іншыя палітыкі, чыноўнікі і вайскоўцы.
Суд задаволіў хадайніцтва аб допыце шэрагу асоб, у тым ліку Парашэнкі, Парубія, Авакава і Турчынава.
У пасяджэнні абвешчаны перапынак да 10:00 11 снежня. У той жа дзень у другой палове дня плануецца допыт двух сведак. Якіх менавіта, у пракуратуры не ўдакладнілі.
Нагадаем, Януковіча падазраюць ва ўчыненні злачынстваў, прадугледжаных ч.1 арт.111 («Дзяржаўная здрада»), ч.5 арт.27, ч.3 арт.110 («Дапамога ў наўмысных дзеяннях, учыненых з мэтай змянення межаў тэрыторыі і дзяржаўнай мяжы Украіны») і ч.5 арт.27, ч.2 арт. 437 («Дапамога ў вядзенні агрэсіўнай вайны) КК Украіны.