Раджэп Эрдаган выставіў Грэцыі тэрытарыяльныя прэтэнзіі

Урад у Афінах раздражнёна адрэагаваў на прэтэнзіі прэзідэнта Турцыі.

Прэзідэнт Турцыі Раджэп Таіп Эрдаган падчас гістарычнага дзяржаўнага візіту ў Грэцыю ў чацвер, 7 снежня, выставіў Афінам тэрытарыяльныя прэтэнзіі, раскрытыкаваў зварот грэцкіх уладаў з прадстаўнікамі турэцкай меншасці і абвінаваціў Еўразвяз у зацягванні рэалізацыі дамовы аб уцекачах, паведамляе DW.

«Паветраныя і марскія межы можна было б палепшыць», - сказаў Эрдаган. Яшчэ да адбыцця ў Афіны турэцкі прэзідэнт паставіў пад сумнеў Лазанскую дамову 1923 года. Паводле гэтай дамовы Грэцыя атрымала амаль усе выспы ў Эгейскім моры на ўзбярэжжа Турцыі. З тых часоў паміж Турцыяй і Грэцыяй не спыняюцца спрэчкі аб дакладным праходжанні мяжы.

Урад у Афінах раздражнёна адрэагаваў на прэтэнзіі Эрдагана, падкрэсліўшы, што ягоны візіт павінен спрыяць «пабудове мастоў, а не муроў». Прэзідэнт Грэцыі Пракопіс Паўлопулас выключыў магчымасць перагляду Лазанскай дамовы. «Для нас гэтая дамова не з'яўляецца прадметам гандлю. Яна не патрабуе ні перагляду, ні абнаўлення», - указаў ён падчас сустрэчы з Эрдаганам у Афінах.

Іншыя прэтэнзіі

Эрдаган абвінаваціў улады Грэцыі ў тым, што яны, насуперак дамове, не дазваляюць турэцкай меншасці выбіраць муфціяў, а прызначаюць іх самі. Прэзідэнт Турцыі падкрэсліў, што для яго абарона правоў этнічных турак з'яўляецца найвышэйшым прыярытэтам. 8 снежня ён наведае турэцкую суполку ў Фракіі ў паўночнай частцы Грэцыі.

Раджэп Таіп Эрдаган таксама абвінаваціў Еўразвяз у невыкананні абяцанняў у эканамічнай сферы, якія вынікаюць з укладзенага паміж бакамі пакта аб рэадмісіі нелегальных мігрантаў. Еўразвяз не выканаў ніводнага са сваіх абяцанняў у гэтай сферы, у той час як Турцыя выканала ўсе свае абавязацельствы, сказаў Эрдаган. Ён, напрыклад, абвінаваціў ЕЗ у нявыплаце абяцанай фінансавай дапамогі.

Аднак прэзідэнт Грэцыі Паўлопулас выказаўся за збліжэнне Турцыі з Еўразвязам. Пры гэтым ён, аднак, адзначыў, што Анкара павінна выконваць міжнародныя дамовы і выканаць умовы для далейшага збліжэння з ЕЗ.

Гэта першы візіт прэзідэнта Турцыі ў Грэцыю за апошнія 65 гадоў. Эрдаган ужо наведваў Грэцыю, аднак, толькі на пасадзе прэм'ер-міністра Турцыі. Пры Эрдагане гістарычна складаныя стасункі паміж Турцыяй і Грэцыяй, нягледзячы на ўсе цяжкасці, палепшыліся. Эрдаган падтрымлівае добрыя дачыненні з прэм'ер-міністрам Грэцыі Алексісам Цыпрасам.