Новыя цягнікі з Менска на Варшаву будуць курсаваць з 10 снежня

БЧ - пра змены ў раскладзе з 10 снежня.

На БЧ з 10 снежня будзе дзейнічаць новы графік руху цягнікоў. Пра гэта прэс-служба чыгункі нагадвае пасажырам.

Цягнікі беларускія і літоўскія - на Вільню

На чыгунках СНД і Еўразвязу з 00.00 гадзін, 10 снежня, пачне дзейнічаць новы графік руху цягнікоў на 2017-2018 гады. БЧ распавядае, што зменіцца ў міжнародных камунікацыях.

Так, паміж Менскам і Вільняй з 10 снежня будуць курсаваць сучасныя электрацягнікі як з боку БЧ, так і з боку «Літоўскіх чыгунак». Пагранічны і мытны кантроль на цягніках №805/806 і №804/807 Менск-Вільня будуць праводзіць на станцыі Гудагай. Час у шляху (2 гадзіны 30 хвілін) пры гэтым не зменіцца.

Новыя цягнікі на Варшаву - з перасадкай у Берасці

Разам з «Польскімі чыгункамі» беларусы арганізавалі штодзённае перасадачнае злучэнне Менск - Берасце - Варшава. Расклад новых цягнікоў №127/128 Берасце - Варшава - Берасце і №728/727 Берасце - Менск - Берасце ўзгоднены па часе для перасадкі пасажыраў на станцыі Берасце-Цэнтральнае пры паездках у абодвух напрамках.

Памежныя і мытныя аперацыі ў цягніку «Польскіх чыгунак» будуць праводзіць на станцыі Берасце-Цэнтральны, пры гэтым пасажырам трэба будзе перайсці са складу ў склад (на суседніх шляхах адной платформы). Больш падрабязна аб новым цягніку Charter97.org распавядаў раней.

Улетку цягнікі ў Адэсу, Варну і Херсон, круглы год - вагоны ў Кішынёў

Улетку 2018 года будзе курсаваць цягнік №451/452 Менск - Варна. Хадзіць ён будзе часцей, чым раней, - 16 рэйсаў замест васьмі.

З Менска цягнік будзе адпраўляцца 10,15, 22, 27 чэрвеня, 4, 9, 16, 21, 28 ліпеня, 2, 9, 14, 21, 26 жніўня, 2, 7 верасня, а ў зваротным напрамку з Варны цягнік будзе адпраўляцца 12, 17, 24, 29 чэрвеня, 6, 11, 18, 23, 30 ліпеня, 4, 11, 16, 23, 28 жніўня і 4, 9 верасня.

Акрамя таго, летам кожны дзень будзе хадзіць цягнік №94/93 Менск - Адэса, таксама запланаваныя штодзённыя цягнікі паміж Менскам і Херсонам, Менскам і Бярдзянскім - па гэтых маршрутах арганізуюць бесперасадачныя вагоны.

З'явяцца бесперасадачныя вагоны і на лініі паміж Менскам і Кішынёвам. Паміж сталіцамі Беларусі і Малдовы ўсталююць рэгулярнае круглагадовае паведамленне.

Электрычкі Менск - Маладзечна падоўжаць да Гудагая, а на Полацк і Ліду пойдуць цягнікі бізнэс-класа

БЧ нагадвае, што ўнутры Беларусі таксама будуць змены. TUT.BY ўжо пісаў, што паміж Менскам і Полацкам, Менскам і Лідай пойдуць цягнікі бізнэс-класа.

Чыгуначнікі аптымізавалі паведамленне на лініі Менск - Маладзечна - Гудагай. Электрычкі Менск - Маладзечна падоўжаць да Гудагая. Пасажыры змогуць кожны дзень ездзіць па гэтай лініі без перасадкі ў Маладэчна.