«Без задатку аўтамабіль вас не дачакаецца»: як ашуканцы з РФ падманваюць беларусаў

Нягледзячы на блізкасць Беларусі і Расеі, многія рэчы прыходзяць да нас са спазненнем.

У адных выпадках накшталт продажу чагосьці новага нічога добрага ў гэтым няма, у іншых жа, калі гаворка ідзе аб ашуканскіх схемах, ад "затрымкі" толькі адны плюсы: ёсць наглядны прыклад суседзяў.

У рэдакцыю ABW.BY звярнуўся чытач. Аляксандр звярнуў увагу на падазроную аб'яву аб продажы цягача Volvo на профільным сайце. Падазрэнні былі выкліканыя адразу некалькімі чыннікамі: "Аўто не адпавядала апісанню паводле мадэлі, году, камплектацыі. І фота, відавочна, былі зроблены не ў Расеі, ужо надта добры быў Volvo. Такіх б/у аўто ў Расеі, асабліва ў Валгаградзе, не - ведаю, быў там не раз. І фота зробленыя летам".

Акрамя таго, выклікаў сумневы і кошт – 17 000 даляраў за цягач 2012 года выпуску? Аўтар аб'явы тлумачыў кошт тэрміновасцю продажу.

"ТЭРМІНОВА! Прадам седлавы цягач Volvo FH 13. Год 2012. Прабег 520 000 км, матор 440 к с. Клас выхлапу - Еўра-5. Высокая кабіна Globetrotter XL. 2 спальныя месцы. 2 паліўныя бакі аб'ёмам 1470 л. Аўтаномны ацяпляльнік Webasto. Падвеска рысорах/паветра. Кандыцыянер. ABS. ASR. Горны тормаз. Круіз-кантроль. Магнітола CD. Узмацняльнік стырна. Блакаванне дыферэнцыялу. Тахограф. Люк. Электралюстэркі. Электрашклопад'ёмнікі. Абаграванне люстэркаў. Супрацьтуманныя фары. Сонцаахоўны казырок. Выдатны стан. Знаходзіцца на стаянцы ў Валгаградзе".

Аляксандр распавёў, што за дзень аб'ява набрала больш за 600 праглядаў, бо прапанова сапраўды прывабная. У тэлефоннай размове прадавец распісваў аўтамабіль у найлепшым выглядзе. Адно але - галоўнай умовай куплі было пералічэнне задатку на банкаўскую карту.

Тая ж "песня" была і пры званку з расейскага нумара. Маўляў, без задатку аўтамабіль пакупніка не дачакаецца. Якія-небудзь пацверджання існавання цягача атрымаць не ўдалося. Пад рознымі падставамі "прадавец" адмаўляўся даць VIN-нумар.

Падазронымі былі і іншыя моманты. Як паведаміў Аляксандр, нумар, указаны ў аб'яве, - з новай серыі расейскага аператара "Білайн". Імёны прадаўца ў аб'яве і ўладальніка банкаўскай карты, на якую прасілі пералічыць задатак, не супадаюць.

На думку Аляксандра, такія ашуканскія схемы ў Расеі ўжо надакучылі, цяпер аматары лёгкай нажывы выпрабоўваюць на трываласць беларусаў. І трэба прызнаць, што, нягледзячы на адкрытае нахабства такога падману, ашуканскі спосаб працуе дагэтуль. Жаданне зэканоміць і нізкі кошт прывабнага аб'екта ўводзяць у зман.

І пацвярджэнняў таму стае нават у Беларусі. Так, яшчэ тры гады таму мы публікавалі гісторыі чытачоў, якія адправіліся па танныя аўтамабілі ў маскоўскія аўтасалоны. У спробе зэканоміць пакупнікі ў выніку пераплачвалі за аўтамабіль альбо з'язджалі зусім не на тым, на чым планавалі. А віной усяму нежаданне ўнікаць у тэкст дамовы.

Яшчэ адзін спосаб страціць аўтамабіль - абмяняцца "ключ на ключ". Такую сітуацыю мы асвятлялі ў траўні 2016 года. Тады расеец сур'ёзна разглядаў абмен сваёй Subaru на Audi Q7 з беларускімі "нумарамі". Прадавец блытаўся ў тлумачэнні паходжання аўто, але здавацца не збіраўся. Праўда, вішанькай на торце апынуўся VIN-нумар, які належыць зусім іншаму Q7, і падроблены тэхпашпарт, у якім "адзінка" ў нумары суседнічала з гараадзенскім выдуманым адрасам.

Вяртаючыся ў часе яшчэ крыху раней, не будзе лішнім успомніць і гісторыю Audi з падробленымі дакументамі, якая "вандравала" па беларускім рынку. "Транзіты" былі не яе, адрас у тэхпашпарце не існаваў у рэальнасці. Далей - яшчэ цікавей: гора-пакупнік вярнуў аўтамабіль прадаўцу, а замест грошай атрымаў распіску з абяцаннем вярнуць суму цягам 10 дзён. А Audi? Яна зноў была выстаўленая на продаж у надзеі знайсці чарговых даверлівых пакупнікоў.

На фоне гэтых гісторый (падробленыя дакументы, перабітыя VIN-нумары) просьба пра задатак за цягач выглядае адкрытым нахабствам і непрыкрытым падманам. Але мы практычна не сумняваемся: у пагоні за нізкім коштам рана ці позна "прадаўцу" атрымаецца выбавіць у даверлівага гора-пакупніка нейкую суму ў выглядзе "задатку".

Такім чынам вымантачвалі грошы пяць гадоў таму, спрабуюць зрабіць гэта цяпер, і наўрад ці "тэма" памрэ ў якой-небудзь найбліжэйшай будучыні. Адрозненні толькі ў шляхах камунікацыі і агульнай канцэпцыі "локшыны". Так, у нашай публікацыі 2012 года махляр тлумачыў неабходнасць пералічэння грошай сваёй адсутнасцю ў краіне. Маўляў, сувязь толькі праз e-mail, пералічэнне грошай праз банк, скідайце фота квітанцыі з закрытым сакрэтным нумарам, і мы абмяркуем, дзе можна забраць аўтамабіль.

А таму нагадваем: пры выяўленні падазроных аб'яў паведамляйце аб гэтым адміністрацыі сайтаў.