У Менску перакулілася маршрутка з пасажырамі

Пасажырам дапамагалі выбрацца праз запасны выхад.

Сёння ўдзень у Менску на скрыжаванні вуліц Ахоцкай і Несцерава адбылася аварыя з удзелам маршрутнага таксі. У выніку мікрааўтобус перакуліўся на бок пасярод праезнай часткі. Унутры знаходзіліся пасажыры, ім дапамагалі выбрацца праз аварыйны выхад, піша onliner.by.

- Маршрутнае таксі на баку, ратавальнікі дапамагалі выбрацца пасажырам праз запасны выхад. Будынак абласнога МНС зусім побач, - распавёў карыстальнік з нікам zarik.ml. - Пад'ехалі дзве хуткія дапамогі. Адна стаіць з адкрытымі заднімі дзвярамі - відаць, камусьці спатрэбіліся насілкі.

Чытач з нікам Дзімон_23 сцвярджае, што на скрыжаванні са светлафорным рэгуляваннем маршрутка сутыкнулася з Toyota. Аднак невядома, ці працаваў святлафор у момант ДТЗ.

Папярэднюю версію здарэння агучыў начальнік аддзела агітацыі і прапаганды УДАІ ГУУС Менгарвыканкама Сяргей Заранік.

- Кіроўца маршрутнага таксі рухаўся вуліцай Несцерава, гэта значыць, галоўнай дарогай. А жанчына на Toyota Prius выехала на скрыжаванне з другараднай дарогі, яна ехала па вуліцы Ахоцкай. Адбылося сутыкненне, у выніку якога мікрааўтобус перакуліўся на бок, - распавялі ў Дзяржаўтаінспекцыі.

На месцы здарэння медыцынскія работнікі аглядаюць удзельнікаў ДТЗ. На гэты момант двум спатрэбілася дапамога. Паводле інфармацыі ДАІ, сур'ёзна пацярпелых няма.

Аб факце ДТЗ праводзіцца праверка, высвятляюцца ўсе абставіны здарэння.