У Магілёве таксісты зладзілі «разборкі» ў стылі 90-х

У Магілёве не рады новай службе таксі.

Служба таксі Protaxi ўжо існуе ў Берасці, Горадні і Віцебску. Але калі ўладальнікі кампаніі крыху больш за год таму вырашылі прыйсці ў Магілёў, то выявілі, што ім у горадзе зусім не рады.

— Кажуць, у Беларусі ёсць усё, акрамя добрага сэрвісу. Гэта наша краіна, наш дом, і тут нам захацелася стварыць што-небудзь вартае, — распавядае tut.by дырэктар кампаніі Андрэй Я. — Мы наважылі гэты сэрвіс стварыць, хай нават гаворка ідзе пра службу таксі.

У Магілёве хлопцам з Protaxi не ўсё атрымалася спачатку, напрыклад, нават набраць каманду кіроўцаў спачатку было складана.

— Да нас проста ніхто не ішоў! Было ад сілы пятнаццаць кіроўцаў. Казалі, у вас нічога не атрымаецца, едзьце ўжо ў сваё Берасце і не высоўвайцеся адтуль.

— Мы прыйшлі на рынак з новымі аўтамабілямі, з тэрміналамі і таксометрамі і зрабілі тарыфы больш таннымі, чым ва ўсіх. Напрыклад, калі звычайна кошт пяці кіламетраў быў роўны 7,5 рубля (75 тысяч да дэнамінацыі), то ў нас гэта было 3 рублі (30 000 рублёў да дэнамінацыі), — кажа Андрэй. — Прыкладна першыя шэсць месяцаў працы да нас у офіс проста прыходзілі таксісты з розных службаў і патрабавалі падняць тарыфы да іх ўзроўню. Мы не пагадзіліся, таму што лічым, што ў нас абгрунтаваная цана. Для замовы таксі мы выкарыстоўваем мабільны дадатак, які эканоміць выдаткі. Хоць, вядома, у нас ёсць і дыспетчары, якія прымаюць званкі па-старому.

Але праз паўгода такіх размоў кіроўцы канкурэнтных службаў таксі перайшлі ад слоў да справы.

— Не праходзіла і тыдня, каб кіроўцы не «прывозілі» пагрозы, потым на нашых аўтамабілях рэзалі шыны, разбівалі люстэркі. Людзі проста баяліся. У ход ішлі нейкія метады 90-х. Абстрэльвалі машыны з траўматычных пісталетаў. Добра, што білі толькі па шыбах і нікога ў машыне не было. Уздзейнічалі рознымі метадамі, а потым пасыпаліся ілжывыя званкі, калі кіроўца прыязджаў на заказ, а там ніхто яго не чакаў і кіроўца губляў час. Зразумела, што кіроўцаў такая абстаноўка напружвала — у многіх сем'і, дзеці.

Зварот у міліцыю трохі астудзіў абстаноўку. І сітуацыя супакоілася.

— Да нас пачалі прыходзіць кіроўцы з іншых службаў таксі, мы змаглі набраць каманду, цяпер кіроўцаў у нас нават больш, чым трэба.

Здавалася б, усё супакоілася і можна працаваць далей. Але пасля навагодніх святаў ціск аднавіўся — і канкурэнты перайшлі ад слоў да справы.

— Усе таксісты ведаюць, што пасля Новага года і Каляд плацежаздольнасць насельніцтва падае. Мы прапанавалі сваім пасажырам акцыю «У буднія дні 5 км за 2,5 рубля». Магчыма, гэта і стала апошняй кропляй. Уначы, 23 студзеня 2017 года, дырэктару нашага філіяла разбілі лабавое шкло, люстэркі, зробленыя ўвагнутасці на капоце і дзвярах. А потым нам пачалі пагражаць фізічнай расправай.

— Мы звярнуліся ў міліцыю з заявай. Цяпер ідзе следства. Зразумела, што знайсці такіх людзей даволі складана. Але мы нікуды сыходзіць не збіраемся.

Нагадаем, што ў лістападзе ўжо пісалася пра перавозчыка, якому таксама не ўзрадаваліся на рынку. Перавозчыку не толькі рэзалі шыны і разбівалі аўто, але і палілі машыны. Тады ў праваахоўнікаў з'явіліся падазраваныя з ліку канкурэнтаў, было распачата дзве крымінальныя справы паводле факта наўмыснага знішчэння маёмасці. Аднак вінаватыя так і не былі знойдзеныя, а перавозчык працягвае працаваць.