Азербайджан адмовіўся прадаваць Беларусі танную нафту
85- 21.02.2017, 12:52
- 40,570
Доўгатэрміновае супрацоўніцтва з Іранам таксама зрываецца.
Менск ацаніў азербайджанскую нафту занадта нізка, таму Баку вымушаны адмовіцца ад супрацоўніцтва. Пра гэта заявіў кіраўнік Цэнтра нафтавых даследаванняў Ільхам Шабан, паведамляе belsat.eu.
Са слоў Шабана, у 2016 годзе Азербайджан адправіў у Беларусь толькі адну партыю нафты аб'ёмам больш за 500 тысяч тон. На пачатку гэтага года пастаўкі спыніліся.
«Як паведамляюць беларускія СМІ, урад краіны планаваў закупляць азербайджанскую нафту ўсяго за $30 за барэль. Гэта значыць, тым жа коштам, якім Беларусь імпартуе расейскую нафту. Азербайджан жа рэалізуе нафту рынкавым коштам», - адзначыў экспэрт.
Шабан адзначыў, што нафтавыя праекты не могуць быць сацыяльнай або міжурадавай праграмай.
«Гэта значыць, пра саступкі не можа ісці і гаворкі, нават калі паміж імпарцёрам і экспарцёрам склаліся цёплыя і дружалюбныя стасункі. Мы не можам зрабіць зніжку, але можам гарантаваць пастаўку высакаякаснага паліва, якое адпавядае еўрапейскім стандартам», - дадаў ён.
Кіраўнік цэнтра нафтавых даследаванняў адзначыў, што чым далей знаходзіцца экспарцёр, тым даражэй будзе каштаваць нафта.
«Таму можна сказаць, што партнёрства з Іранам не будзе мець доўгатэрміновы характар. Хутчэй за ўсё, іранцы зробяць дзве-тры пастаўкі ў Беларусь, і на гэтым скончыцца іх супрацоўніцтва», - адзначыў Шабан.
18 лютага стала вядома, што Іран паставіць у Беларусь 600 тысяч барэляў (84 тысячы тоны) нафты да канца лютага. У канцэрне «Белнафтахім» гэтую інфармацыю не пацвярджаюць, аднак падкрэсліваюць, што «канцэрн займаецца выкананнем даручэння кіраўніка дзяржавы ў дыверсіфікацыі паставак нафты».