Парламент Вялікабрытаніі прыняў «закон Магніцкага»

Чальцы брытанскага парламента аднагалосна ўхвалілі папраўкі да закону, паводле якіх супраць людзей, якія парушаюць правы чалавека, могуць быць уведзеныя санкцыі.

Тэкст паправак апублікаваны на сайце брытанскага ўрада.

Згодна з законам, акты парушэнняў правоў чалавека могуць быць учыненыя як у Вялікабрытаніі, так і за яе межамі.

«Гэты закон выкліча адчувальны страх сярод клептакратаў у Расеі ды іншых краінах з аўтарытарнымі рэжымамі. Многія з іх маюць дарагую ўласнасць у Лондане і думаюць, што яны недатыкальныя.

Прыняцце гэтага закона з'яўляецца вынікам сямі гадоў працы ў імя нябожчыка Сяргея Магніцкага, які раскрыў і даў сведчанні аб шматмільённай карупцыйнай схеме, зладжанай расейскімі афіцыйнымі асобамі, і быў забіты за свае сведчанні»,, — сказаў Уільям Браўдэр, лідар руху «Справядлівасць для Сяргея Магніцкага» і аўтар кнігі «Як я стаў ворагам Пуціна №1».

«Закон Магніцкага» быў прыняты ў ЗША ў снежні 2012 года. Краіна ўвяла санкцыі супраць расейскіх чыноўнікаў, якія маюць дачыненне да загубы адваката Сяргея Магніцкага. Пазней санкцыйны спіс быў павялічаны. У студзені гэтага года Мінфін ЗША распаўсюдзіў дзеянне санкцый, звязаных са «справай Магніцкага», яшчэ на пяць грамадзян РФ.

Санкцыі ўведзеныя ў дачыненні да старшыні Следчага камітэта Расеі Аляксандра Бастрыкіна, следчага Станіслава Гардзіеўскага, бізнэсоўца Дзмітрыя Каўтуна, дэпутата Дзярждумы Андрэя Лугавога і фігуранта праведзенага фондам Hermitage Capital расследавання Генадзя Плаксіна, абвінавачанага ва ўдзеле ў ашуканскіх схемах у якасці намінальнага кіраўніка.

23 снежня прэзідэнт ЗША Барак Абама падпісаў закон аб абаронных выдатках на 2017 год, які абмяжоўвае вайсковае супрацоўніцтва з Расеяй, што надае глабальны статус «закону Магніцкага».