«Бензінавыя рэкі» з Беларусі значна змялелі

У некаторых кірунках падзенне экспарту нафтапрадуктаў склала амаль 100%.

Прасяданне беларускага экспарту ў 2016 годзе на 12,2% у валютным вылічэнні выклікае сур'ёзную трывогу за стабільнасць нацыянальнай эканомікі ў найбліжэйшай перспектыве.

«Заўтра тваёй краіны» прааналізавала, дзе сітуацыя правальная, а дзе захаваліся і з'явіліся магчымыя прасветы.

Галоўнай прычынай памяншэння валютных паступленняў летась (іх аб'ём склаў у гандлі таварамі 23 415, 5 млн даляраў) стала скарачэнне паставак нафтапрадуктаў на заходнееўрапейскі рынак. Невыпадкова галоўны адрасат папярэдніх гадоў - Злучанае Каралеўства - узначальвае спіс найбольш праселых летась рынкаў для беларускага экспарту.

Паводле звестак Нацыянальнага статыстычнага камітэта, ёсць рынкі з яшчэ больш значным падзеннем продажаў да 2015 года. Лідарам стала Ліберыя - экспарт у гэтую краіну абваліўся да 14,3% да 2015 года. Экспарт беларускіх тавараў у Грэцыю склаў усяго 17,4%, у Сербію - 26,7%, на Тайвань - 33,2%.

Але ў агульным аб'ёме экспарту пастаўкі ў гэтыя краіны цалкам не супастаўныя з мільярднымі даходамі, якія атрымлівала і яшчэ атрымлівае Беларусь, прадаючы нафтапрадукты ў Вялікую Брытанію. Так што ўсяго 36,8% да 2015 года на гэтым рынку - выглядае амаль катастрофай. Скарачэнне амаль на 20% экспарту ў Нідэрланды, на 55% у Латвію - гэта таксама вынік абмялення бензінавых рэк з Беларусі. Памяншэнне нафтавых плыняў адбілася і на паказчыках гандлю з Літвой.

Звяртае на сябе ўвагу паслабленне азіяцкага вектару: у 2016 годзе экспарт беларускіх тавараў паменшыўся ў Кітай і Індыю і нават самы блізкі, зыходзячы з геапалітыкі, Казахстан.

Гэтыя краіны ўвайшлі ў топ-10 праселых летась рынкаў для таварнага экспарту з Беларусі. У яго ўключаны краіны, якія маюць найбольшыя долі ў агульнай структуры паставак з нашай краіны.

Рост пастаўкі нафтапрадуктаў ва Украіну - адзіны істотны «прасвет» у гэтай пазіцыі. Іх аб'ёмы выраслі ў кошце на 2,7%, а агулам экспарт у паўднёвую суседку за 2016 прырос на 13,2%.