Сэнатар і кангрэсмэн ЗША заклікалі пастаўляць Украіне баявую зброю
4- 22.02.2017, 21:33
- 52,229
Два амерыканскія заканадаўцы паабяцалі звярнуцца з адпаведнай прапановай да Кангрэсу.
Два амерыканскія заканадаўцы ўважаюць за неабходнае пастаўляць Украіне баявое ўзбраенне, каб яна змагла лепш абараняць сябе ад сепаратыстаў, якіх падтрымлівае Расея.
У інтэрв'ю «Радыё Свабода» сэнатар Рычард Дурбін і чалец Палаты прадстаўнікоў Майкл Куіглі выказалі меркаванне, што прэзідэнт Расеі Уладзімір Пуцін прадаўжае курс на канфрантацыю з Украінай.
Дурбін асабна адзначыў указ Пуціна аб прызнанні законнасці «пашпартоў» ды іншых дакументаў, выдадзеных жыхарам тых раёнаў Данецкай і Луганскай абласцей, якія кантралююць сепаратысты.
Майк Куіглі заявіў, што баявая зброя патрэбная Украіне, бо яна супрацьстаіць «сілам, якія перасягаюць яе ў тэхнічным аспекце».
Сенатар і кангрэсмэн абяцалі звярнуцца з адпаведнай прапановай да Кангрэсу.
Днямі віцэ-прэзідэнт ЗША Майкл Пэнс і амерыканскі прадстаўнік пры ААН Нікі Хэйлі выказалі рашучую падтрымку Кіеву і абвінавацілі Расею ў агрэсіўных дзеяннях на Данбасе.
Расея адмаўляе якое-небудзь дачыненне да канфлікту на ўсходзе Украіны.
Дагэтуль Вашынгтон надаваў Кіеву толькі вайскова-тэхнічную і кансультацыйную дапамогу.