Пачаўся суд над начальнікам Баранавіцкага ДАІ, што збіў жанчыну
26- 28.02.2017, 10:20
- 19,292
Суд праходзіць у Ляхавічах.
Суд Ляхавіцкага раёна 28 лютага пачаў разгляд крымінальнай справы паводле абвінавачвання былога часовага выканаўцы абавязку начальніка АДАІ Баранавіцкага ГАУС Андрэя Валкавыцкага ў ДТЗ, якое забрала жыццё 36-гадовай жанчыны. На першым пасяджэнні выступіць бок абвінавачвання, абвінавачаны, а таксама заслухаюць сведак, піша tut.by.
Суд пачаўся а 10.00. Абвінавачванне падтрымлівае старэйшы пракурор аддзела пракуратуры Берасцейскай вобласці Генадзь Буры. Паводле матэрыялаў справы Андрэй Валкавыцкі абвінавачваецца ў парушэнні ПДР асобай, якая кіравала транспартным сродкам у стане алкагольнага ап'янення, што пацягнула праз неасцярожнасць смерць чалавека (ч.4 арт. 317 КК). Калі яго віна будзе даведзеная, яму пагражае да 7 гадоў пазбаўлення волі з пазбаўленнем права займаць пэўныя пасады і займацца пэўнай дзейнасцю.
Абвінавачаны Андрэй Валкавыцкі пад вартай знаходзіцца з 26 лістапада 2016 года, на пытанні суддзі адказвае ледзь чутна, глядзіць у падлогу.
У залі прысутнічаюць сваякі загінулай Вольгі Стралкоўскай. Мама загінулай трымае ў руках фатаграфію дачкі, побач сядзіць унучка.
На суд прыехалі сваякі і блізкія сябры загінулай Вольгі Стралкоўскай
Нагадаем, ДТЗ адбылося 26 лістапада 2016 года ў Ляхавіцкім раёне: былы часовы выканаўца абавязкаў начальніка Баранавіцкага АДАІ Андрэй Валкавыцкі за стырном Opel Zafira учыніў на пешаходным пераходзе наезд на 36-гадовую жыхарку Слуцка. Жанчына памерла на месцы аварыі. У момант наезду кіроўца быў нецвярозы — амаль 3 праміле алкаголю.
На гэтым скрыжаванні адбылася трагедыя ў лістападзе мінулага года
Расследаваннем крымінальнай справы займаліся супрацоўнікі ўпраўлення Следчага камітэта Берасцейскай вобласці. Паводле версіі следства, пацярпелая ў момант ДТЗ рухалася па пешаходным пераходзе злева направа па ходзе руху аўтамабіля. Хуткасць руху транспартнага сродку, паводле папярэдніх звестак, складала звыш 60 км/ч. Мужчына быў не пры выкананні, на асабістым аўтамабілі і ў грамадзянскім адзенні.
«Оля заўсёды баялася машын». У Слуцку развіталіся з загінулай пад коламі аўтамабіля п'янага даішніка
ДТЗ выклікала рэзананс у грамадстве: пасля яго ў МУС пачаліся праверкі супрацоўнікаў з выкарыстаннем паліграфа.