«Газпрам» павысіць кошт газу для Еўразвязу
13- 28.02.2017, 10:38
- 14,637
Цана павысіцца амаль на $20 за тысячу кубаметраў.
Экспартны кошт газу для Еўразвязу ў гэтым годзе можа скласці 180-190 даляраў за тысячу кубаметраў. Пра гэта паведаміў намеснік старшыні праўлення «Газпрама» Аляксандр Мядзведзеў, паведамляе ria.ru.
Ён адзначыў, што ў 2016-м еўрапейскія краіны плацілі за паліва менш — блізу 167 даляраў за тысячу кубаметраў. «Еўропа была, ёсць і застаецца прыярытэтным рынкам для «Газпрама», — дадаў прадстаўнік расейскай кампаніі.
Доля «Газпрама» на гэтым рынку, са слоў Мядзведзева, расце: у 2015 годзе яна складала 31 адсотак, у 2016-м вырасла да 34 адсоткаў.
У студзені паведамлялася, што на пачатку 2017-га «Газпрам» нарасціў экспарт газу ў Еўропу на 20 адсоткаў у параўнанні з аналагічным перыядам мінулага года. Сутачныя аб'ёмы паставак паліва ў гэты рэгіён былі рэкорднымі праз рэзкае пахаладанне. Спажыўцам было пастаўлена 624 мільёны кубаметраў газу. Папярэдняе пікавае значэнне, таксама вызначанае ў студзені, складала 621,8 мільёна кубаметраў.