«Я пляваў на ПДР, бо я служу ў ДАІ»

Сталі вядомыя новыя падрабязнасці пра суд над экс-начальнікам Баранавіцкай ДАІ, які збіў жанчыну.

На судзе над экс-начальнікам Баранавіцкай раённай ДАІ Андрэем Валкавыцкім не сталі паказваць запіс відэарэгістратара з месца здарэння. Гэта было зроблена, улічваючы стан маці і дачкі загінулай жанчыны. Пракурор толькі зачытаў расшыфроўку відэароліка, паведамляе onliner.by.

З ягоных слоў, на відэа пасля ДТЗ чуваць, як мужчына п'яным голасам спявае песню, у якой ёсць радок: «Я клаў на ПДР, бо я служу ў ДАІ».

У судзе было агучана, што Валкавыцкі ехаў па трасе Баранавічы - Ляхавічы ў вёску Дарава з хуткасцю 100 кіламетраў на гадзіну, хоць там максімальна дазволена 60 км/г. Гэтая хуткасць не дазваляла кіроўцу пры неабходнасці саступіць шлях пешаходам. Як вядома, 36-гадовая жанчына пераходзіла дарогу па нерэгуляваным пешаходным пераходзе. Кіроўца легкавушкі пры выбары хуткасці руху не ўлічыў абмежаванне пры пад'ездзе да яго, які ён бачыў. Адзначаецца, што абвінавачваны быў няўважлівы ў той дарожнай сітуацыі. Ён не прапусціў пешахода, хоць меў такую магчымасць. Жанчына загінула ад атрыманых траўмаў (усяго ў яе налічылі 42 пашкоджанні).

Таксама ў судзе было адзначана, што алкагольнае ап'яненне кіроўцы і перавышэнне хуткасці не спрыялі сталаму кантролю за бяспечным рухам аўтамабіля. Сам абвінавачваны падчас допыту патлумачыў, што 26 лістапада 2016 года, знаходзячыся ў Ляхавічах, у перыяд з 18-й да 20-й гадзіны ўжываў спіртныя напоі. Потым ён наважыў паехаць у Баранавічы на сваім аўтамабілі Opel Zafira. Мужчына сцвярджае, што на пад'ездзе да Дарава ён скінуў хуткасць да 60 км/г, а пасля за спідометрам не сачыў. Таму дапускае, што моцна перавысіў хуткасць.

Пешаходны пераход наперадзе ён бачыў, але пешаходаў паблізу не заўважыў. На правай абочыне стаяў легкавік. Кіроўцу здалося, што ля яго мог быць чалавек, таму ён узяў лявей, баючыся сутыкнення. Калі паглядзеў наперад, убачыў, што збіў жанчыну. Да прыезду следча-аператыўнай групы Валкавыцкі заставаўся на месцы.

Паводле звестак медагляду, спачатку ў кіроўцы было выяўлена 2,7 праміле алкаголю, крыху пазней значэнне паднялося да 3,4 праміле.

А 15.20 пасяджэнне суда на сёння скончылася. Яно прадоўжыцца 1 сакавіка: у гэты дзень чакаюцца спрэчкі бакоў.

28 лютага ў Ляхавічах пачаўся суд над былым кіраўніком Баранавіцкай ДАІ. Працэс адкрыты. Андрэй Валкавыцкі, пад коламі аўтамабіля якога ў лістападзе 2016 года загінула жанчына, цалкам прызнаў сваю віну і раскаяўся. Яго абвінавачваюць у «парушэнні правілаў дарожнага руху асобай, якая кіравала транспартным сродкам у стане алкагольнага ап'янення, што прывяло па неасцярожнасці да смерці чалавека» (ч.4 арт.317 КК).