Уладзімір Кавалкін пра падатак на «дармаедства»: Улады страляюць з гарматы па вераб'ях

Эканаміст пракаментаваў інфармацыю падатковай аб тым, што 90% «дармаедаў» так і не заплацілі падатак.

Міністэрства падаткаў і збораў апублікавала інфармацыю, што так званы падатак на «дармаедаў» аплацілі толькі 44,5 тысячы беларусаў – гэта значыць, дзясятая частка ад агульнай колькасці тых, каго дзяржава запісала ў сацыяльныя ўтрыманцы.

Пры гэтым падаткавікі змаглі сабраць суму, эквівалентную 7 мільёнам даляраў, хоць першапачаткова размова ішла аб 100-150 мільёнах.

Ці варта аўчынка вычынкі? «Салiдарнасць» пацікавілася ў эканаміста, кіраўніка праекта «Кошт урада» Уладзіміра Кавалкіна.

– Абсалютна не варта, – адзначыў эканаміст. – Калі палічыць працавыдаткі чыноўнікаў на гэты збор, выдаткі на тое, каб супаставіць базы звестак і знайсці гэтых самых «дармаедаў», а потым яшчэ і прымусіць іх заплаціць гэты збор, то атрымаецца: грошай сыдзе значна больш, чым прыбудзе ў скарбніцу. Тым больш, як мы бачым, амаль 90% людзей хаваюцца і плаціць не хочуць.

Што да штрафаў, якія падатковая мае намер пачаць налічваць беларусам ужо з 20 лютага, то яны таксама не зменяць сітуацыю ў лепшы для чыноўнікаў бок, упэўнены экспэрт.

– Важна зразумець, які штраф будзе налічвацца напраўду, – тлумачыць Уладзімір Кавалкін. – І супаставіць гэтыя звесткі з інфляцыяй. Калі ў нас інфляцыя складзе за год 10%, а таксама штраф складзе 10-15% ці блізу таго, то ўсе гэтыя штрафныя санкцыі наўрад ці паўплываюць на людзей і прымусяць іх заплаціць.

Агулам эканаміст назваў скандальны дэкрэт захадам «дзіўным і эканамічна неэфектыўным».

– Калі ўрад хацеў дамагчыся таго, каб людзі, якія не плацяць падаткі і працуюць у шэрай эканоміцы, сталі плаціць гэтыя падаткі, то трэба было дамагацца гэтага зусім іншымі метадамі, што вядомыя і выкарыстоўваюцца ў свеце. Але надумалі пайсці старым савецкім шляхам... На Захадзе ёсць разуменне «безумоўны даход» (калі ўсё адно – працуеш ты ці не, дзяржава плаціць сваім грамадзянам грошы), то ў Беларусі атрымліваецца «безумоўны выдатак».

Магчыма, урад і хацеў бы уключыць адступіцца і скасаваць гэты дэкрэт, але гонар не дазваляе. Думаю, мы і далей будзем назіраць працэс, калі дзяржава будзе спрабаваць страляць з гарматы па вераб'ях. Прычым, безвынікова і неэфектыўна, – падрахаваў эканаміст.