Раварыст з нажом і пісталетам паспрабаваў абрабаваць краму ў Смалявічах

Мужчыну дагэтуль шукае міліцыя.

Позна вечарам 4 сакавіка ў Смалявічах невядомы мужчына спрабаваў абрабаваць краму. Але, як і сама прадавачка, разгубіўся і кінуўся наўцёкі. Мужчыну дагэтуль шукае міліцыя, паведамляе УУС Менаблвыканкама.

Прыкладна а дзявятай гадзіне вечара ў краму «Алімпія» на вуліцы Жодзінскай зайшоў мужчына. У гандлёвай зале нікога не было, наведвальнік адразу адвярнуўся ад прадавачкі - а праз пару секунд ужо быў у чорнай шапцы з прарэзамі для вачэй. У руках ён трымаў кухонны нож і прадмет, падобны на пісталет.

Мужчына паспрабаваў зайсці за прылавак і, пагражаючы расправай, патрабаваў грошай.

«Прадавачка крыху разгубілася. Пацягнулася да касы, затым да кішэняў, паўстала невялікая замінка. Пагрозы яшчэ больш палохалі, ад разгубленасці жанчыну не слухаліся рукі. Паляцела дробязь, звонку раздаўся шум. Рабаўнік зрабіў рэзкі рух і кінуўся да выхаду. Відавочна, здалі нервы», - паведамілі ва УУС.

Мужчына паімчаўся з крамы на дарожным веласіпедзе: спачатку ўніз вуліцай Жодзінскай, потым звярнуў да Савецкай.

Міліцыя прадаўжае вышук і спадзяецца на дапамогу грамадзян. Прыкметы падазронага: на выгляд блізу 40 гадоў, рост 165-170 см, быў у чорнай шапцы і сіняй балонневай куртцы без каптура, пад вачыма сінія кругі.