Барысаўскі бухгалтар выкраў $200 тысяч
9- 15.03.2017, 14:41
- 44,216
38-гадовы жыхар Барысава скраў грошы з рахункаў шасці кааператываў.
38-гадовы жыхар Барысава выкраў больш за 400 тысяч рублёў з рахункаў шасці жыллёва-будаўнічых спажывецкіх кааператываў, у якіх ён працаваў бухгалтарам. Пра гэта сёння, 15 сакавіка, паведамілі ў Камітэт дзяржаўнага кантролю. Следчы камітэт распачаў у дачыненні да мужчыны шэраг крымінальных спраў, піша telegraf.by.
Факты крадзяжоў былі выяўленыя работнікамі фінміліцыі і Дзяржкантролю падчас праверкі фінансава-гаспадарчай дзейнасці ЖБВК. Высветлілася, што бухгалтар пералічваў грошы чальцоў кааператываў на асабістыя рахункі ў банку, а таксама на рахункі сваякоў і знаёмых. Гэта адбывалася пад выглядам вяртання паявых унёскаў. Затым грошы здымалася гатоўка, і мужчына забіраў яе сабе. Такім чынам за некалькі гадоў ён здолеў скрасці больш за 400 тысяч рублёў.
Барысаўскія следчыя распачалі ў дачыненні да яго некалькі крымінальных спраў, якія былі аб'яднаныя ў адну. Мужчына абвінавачваецца ў крадзяжы шляхам злоўжывання службовымі паўнамоцтвамі, учыненым паўторна, у асабліва значнай суме. Ён знаходзіцца пад вартай, ягоная маёмасць арыштаваная.
У КДК адзначылі, што абвінавачаны добраахвотна кампенсаваў шкоду ў суме больш за 40 тысяч рублёў.