Маёмасць «Шклозавода Ялізава» хочуць прадаць мінімум за 32 мільёны рублёў

Кіраўнік шклозавода абвясціў паўторны адкрыты аўкцыён для продажу трыма лотамі маёмасці прадпрыемства.

Інфармацыя аб гэтым размешчаная на адзіным партале звестак аб банкруцтве, паведамляе tut.by.

Першы лот уключае вытворчыя цэхі і дапаможныя памяшканні агульнай плошчай 44,9 тысяч кв м, размешчаныя на аб'яднаных зямельных надзелах агульнай плошчай 25,667 га. Стартавы кошт — 26,5 млн рублёў. Раней не знайшлося ахвотных купіць маёмасны комплекс за 29 млн рублёў.

Пад другім лотам ідзе інвентар, сыравіна, прадукцыя на агульную суму 4,8 млн рублёў.

Лот №3 дэбіторская запазычанасць 6 кампаній на агульную суму амаль 880 тысяч рублёў.

Крок аўкцыёну складае 5% ад пачатковага кошту лота.

Аўкцыён адбудзецца 28 сакавіка на самім заводзе ў паселішчы Ялізава.

Эканамічны суд Магілёўскай вобласці 12 красавіка 2016 года прыняў пастанову аб прызнанні банкрутам шклозавода «Ялізава» і адкрыцці ў дачыненні да яго ліквідацыйнай вытворчасці на 1 год. «Але гэта не азначае закрыццё завода. Праз працэдуру ліквідацыі прадпрыемства вызваляецца ад пазык», — адзначалі ў судзе.

Прадпрыемства можа перайсці да новага ўласніка. Гэтым уласнікам, хутчэй за ўсё, стане дзяржава, якая з'яўляецца асноўным крэдыторам.

Пакуль шклозавод «Ялізава» — гэта беларуска-аўстрыйскае прадпрыемства. Акцыянерамі кампаніі з'яўляюцца аўстрыйская Foton GmbH (раней ATEC Holding GmbH) — 65% акцый, і Дзяржаўны камітэт маёмасці Беларусі (35%). Кампанію кантраляваў вядомы беларускі бізнэсовец Аляксандр Мураўёў, які быў у мінулым годзе затрыманы паводле справы «Мотавела», а ў студзені прысуджаны да 11 гадоў калоніі.