Мінэнэрга РФ невядома пра пазоў Беларусі да Расеі аб пастаўках нафты

Раней аб наяўнасці такога пазову заяўляў Лукашэнка.

Міністр энэргетыкі Расеі Аляксандр Новак заявіў, што ў Мінэнэрга няма інфармацыі пра такі пазоў Беларусі да Расеі аб пастаўках нафты, паведамляе RNS.

Раней паведамлялася, што ў суд Еўразійскага эканамічнага саюза (ЕАЭС) не паступаў пазоў Беларусі з нагоды абмежавання аб'ёмаў расейскай нафты, якая пастаўляецца ў краіну.

Аляксандр Лукашэнка заявіў, што Беларусь падала ў суд праз зрыў дамоўленасцяў з Расеяй аб пастаўках нафты. Лукашэнка таксама даручыў знайсці альтэрнатыву расейскай нафце.

У сваю чаргу, у прэс-службе Крамля заявілі, што Расея надавала і далей надае дапамогу Беларусі, у тым ліку страціўшы $22,3 млрд у 2011-2015 гадах ад бязмытных паставак нафты.