24 сакавiка 2017, Пятніца, 11:06

Генадзь Фядыніч: Народны пратэст узмацняецца

27
ФОТА: EPA

Беларусы гатовыя бараніць сваё права на годнае жыццё.

Пра гэта ў інтэрв'ю Charter97.org заявіў адзін з лідараў Беларускага Нацыянальнага Кангрэса, старшыня Незалежнага прафсаюза радыёэлектроннай прамысловасці (РЭП) Генадзь Фядыніч.

- 15 сакавіка прайшлі масавыя «Маршы недармаедаў» у Менску, Горадні і Магілёве. Як па гэтых акцыях вы ацэньваеце настрой у грамадстве?

- Я ўдзячны ўсім людзям, якія выйшлі на «Маршы недармаедаў». Большасць з іх не маюць ніякага дачынення да дэкрэту №3: гэта рабочыя, пенсіянеры, людзі розных прафесій. Мы ўбачылі сапраўдны народны пратэст. Усё роўна, колькі дакладна людзей выйшла на акцыі ў Менску, Магілёве і Горадні. Важна тое, што пасля затрымання шэрагу актывістаў апазіцыі людзі змаглі самаарганізавацца і годна правесці Маршы.

Мы ўбачылі, што беларусам надакучыла маўчаць. Улада давяла людзей, і яны гатовыя да масавых пратэстаў. Людзі выходзілі цэлы месяц па ўсёй Беларусі і паказалі, што яны хочуць пераменаў.

- Панічная рэакцыя ўладаў паказвае, што іх напалохаў маштаб народных выступаў. На вашу думку, чаго дамогся рэжым сваімі хаатычнымі дзеяннямі пасля акцый 15 сакавіка?

- Можна сказаць, што бессэнсоўныя дзеянні ўладаў яшчэ больш абурылі беларусаў. Пасля 15 сакавіка нават тыя людзі, якія былі далёкія ад палітыкі, гатовыя хоць сёння выйсці на Плошчу. Многія беларусы перакананыя: ні ў якім выпадку нельга дараваць уладам тое, што яны зрабілі з моладдзю, з нашымі дзецьмі, пасля Маршаў 15 сакавіка.

Даверу да гэтай улады ўжо не засталося. У Магілёве выходзіў да пратэстоўцаў так званы «дэпутат», казаў, што будуць змены ў дэкрэт №3. Ужо позна! Дзе вы, так званыя «дэпутаты», былі, калі народныя пратэсты толькі разгараліся? Дзе вы былі, калі міліцыя ў цывільным затрымлівала моладзь? Ніхто ўжо не лічыць вас уладай.

Можна сказаць, 15 сакавіка ўлада пацярпела паразу. Тое, што яны зрабілі пасля акцыі – ніякім чынам не «супакоіць» людзей. Наадварот, людзі цяпер раззлаваныя яшчэ больш. Такой злосці і раздражнення на рэжым даўно ўжо не было. І зараз усе гэтыя людзі выйдуць на Плошчу.

Відэаролікі з затрыманнямі абляцелі ўсю Беларусь, і людзі ўбачылі, што імі кіруюць звычайныя бандыты і злачынцы. І пакаранне за тое, што яны робяць, не мае ступені даўніны. Пратэст супраць незаконнай улады толькі ўзмацніўся.

- Кіраўнікі народных пратэстаў не раз казалі, што важна ўсім выйсці 25 сакавіка на Дзень Волі ў Менску. Што б вы хацелі сказаць злуецца беларусам, якія будуць на Плошчы?

- Я хачу звярнуцца ў першую чаргу да рабочых, інжынераў, да студэнтаў: не азірайцеся вы на свае кантракты.

Заўтра эканоміка краіны канчаткова «ляжа» праз некампетэнтнае кіраўніцтва, і гэтыя кантракты стануць увогуле непатрэбнымі.

Вы павінны змагацца за свае правы ўжо цяпер – і самі зробіце сябе свабоднымі людзьмі. Улады могуць абвясціць 25 сакавіка працоўным днём або пайсці яшчэ на нейкія хітрыкі. Не верце ім!

Цяпер такі час, што калі мы абаронім Беларусь – мы абаронім і свае правы, і годную працу і годнае жыццё. 25 сакавіка на плошчы ў Менску мы павінны быць разам – дзеля нашай агульнай будучыні.