Рада ЕЗ узгадніла бязвізавы рэжым для Украіны

Рада Еўрапейскага звязу ўзгадніў візавую лібералізацыю для грамадзян Украіны.

Аб гэтым паведамляе gordonua.com са спасылкай на прэс-службу Рады ЕЗ.

Такім чынам амбасадары краін Еўразвязу ад імя Рады ЕЗ пацвердзілі неафіцыйнае пагадненне аб бязвізавым рэжыме для Украіны, якое было дасягнута 28 лютага.

Пагадненне прадугледжвае бязвізавы рэжым для ўкраінцаў пры паездках у краіны ЕЗ на 90 дзён цягам 180 дзён тэрміну.

«Мы прадэманстравалі нашую цвёрдую прыхільнасць бязвізавага рэжыму для ўкраінцаў. Цяпер Украіна выканала неабходныя ўмовы для бязвізавага рэжыму. Рэформа механізму прыпынення, прынятая 27 лютага, дазволіла нам закончыць гэта пагадненне», - цытуе прэс-служба мальтыйскага міністра ўнутраных спраў і нацыянальнай бяспекі Кармела Абэлу.

28 лютага ў Еўразвязе закончыліся міжінстытуцыянальныя перамовы аб наданні бязвізавага рэжыму Украіне паміж Еўрапейскім парламентам, Радай ЕЗ і Еўракамісіяй, па выніках якіх была ўзгодненая пастанова аб увядзенні бязвізавага рэжыму для грамадзян Украіны.

Еўрапейскі парламент плануе разгледзець пытанне аб увядзенні бязвізавага рэжыму для грамадзян Украіны 5 красавіка.

Еўракамісія прызнала, што Украіна выканала ўсе ўмовы для атрымання бязвізавага рэжыму ў снежні 2015 года. Восенню 2016 года праект аб наданні права бязвізавых паездак у Еўропу для грамадзян Украіны прайшоў узгадненне ў камітэтах Еўрапарламенту.

Еўрапейскія чыноўнікі адзначалі, што Украіна атрымае бязвізавы рэжым толькі пасля таго, як будзе ўзгоднены механізм яго прыпынення. Еўрапарламент ухваліў увядзенне такога механізму на пасяджэнні 15 снежня.