Украіна зноў хоча забараніць вяшчанне тэлеканала «Беларусь 24»

У эфіры беларускага тэлеканала супрацоўнікі Нацрады зафіксавалі мапы Украіны без выявы Крыма.

Нацыянальная рада ў тэлевізіі і радыёвяшчанні Украіны звярнулася да кіраўніцтва тэлеканала «Беларусь 24» з просьбай ліквідаваць парушэнне ўкраінскага заканадаўства, напрыклад, паказ мапы Украіны без Крыма. Пра гэта паведамляе tut.by са спасылкай на прэс-службу ўкраінскай установы.

«Нацыянальная рада лістом праінфармавала дырэктара тэлеканала «Беларусь 24» Аляксандра Мартыненку аб выяўленых у эфіры тэлеканала парушэннях заканадаўства Украіны і просіць іх ліквідаваць», - гаворыцца ў паведамленні.

Як растлумачылі ў прэс-службе, у эфіры беларускага тэлеканала ў праграме «Акцэнты» супрацоўнікі Нацрады зафіксавалі дэманстрацыю мапы Украіны без выявы Крыма.

«Акрамя таго, тэлеканал транслюе прадузятую інфармацыю аб існай сітуацыі ва Украіне, ідучы за агульнапрынятымі журналісцкімі стандартамі. Так, 26 лютага ў інфармацыйна-аналітычнай праграме «Галоўны эфір» не быў выкананы баланс поглядаў на асобныя палітычныя падзеі ва Украіне, што прывяло да аднабокага іх асвятлення», - адзначылі ў Нацрадзе.

Рэгулятар просіць Белтэлерадыёкампанію прывесці змест праграм у адпаведнасць з патрабаваннямі. «У выпадку ігнаравання патрабаванняў украінскага заканадаўства рэгулятар будзе вымушаны разгледзець пытанне аб спыненні рэтрансляцыі праграм «Беларусь 24» на тэрыторыі Украіны», - падкрэслілі ў прэс-службе Нацрады.

Нагадаем, гэта ўжо не першы раз, калі Украіна думае аб тым, каб забараніць трансляцыю беларускага тэлеканала. У кастрычніку 2014 года прэтэнзіі ў краіны-суседкі, напрыклад, выклікала праграма «Правы чалавека. Погляд у свет». Нацрада ўгледзела ў ёй антыўкраінскую прапаганду і скажэнне інфармацыі аб палітычных падзеях ва Украіне. Трансляцыя тэлеканала на тэрыторыі Украіны была спыненая, і адноўленая ў канцы 2014 года.