Арына Сабаленка намінаваная на прэмію Кубка федэрацыі тэніса

Беларуска за 2016 год зрабіла ўражлівы скачок у сусветным рэйтынгу.

Беларуская тэнісістка Арына Сабаленка намінаваная на прэмію Heart Award, якую арганізатары Кубка федэрацыі ўручаюць «за выдатную смеласць на корце і адданасць камандзе», паведамляе tut.by.

Паводле вынікаў першага кола Сусветнай групы абвешчаныя імёны пяці намінантаў на прэмію. Акрамя беларускі Арыны Сабаленкі ў спісе прэтэндэнтак славачка Рэбека Шрамкова, чэшка Караліна Плішкова, швейцарка Тымеа Бачынскі.

Галасаванне за прэтэндэнтак на афіцыйным сайце Кубка федэрацыі пачынаецца 24 сакавіка.

У Арыны Сабаленкі быў добры 2016 год, калі яна зрабіла скачок у сусветным рэйтынгу з 548-й на 159-ы радок. У Кубку Федэрацыі дэбютавала ў 18-гадовым узросце, згуляўшы за нацыянальную каманду Беларусі ў леташнім матчы плэй-оф Сусветнай групы.

А ў лютым гэтага года яна дапамагла нацыянальнай камандзе ўпершыню ў гісторыі прабіцца ў паўфінал Кубка федэрацыі. Тады ў першы дзень чвэрцьфінальнага матчу з Галандыяй Арына сустракалася з Кікі Бертэнс — адной з гераінь Кубка Федэрацыі ў папярэдніх сезонах. У напружаным паядынку беларуска прымусіла моцна панервавацца Бертэнс, але ўсё ж саступіла доследнай спаборніцы — 6:3, 6:7 (6:8), 4:6. Аднак у наступнай сустрэчы Сабаленка адолела Міхаэлу Крайчак— 7:6 (7:5), 6:4 і прынесла беларускай дружыне пераможны бал.

У паўфінале Кубка федэрацыі каманда Беларусі пазмагаецца з камандай Швейцарыі на корце «Чыжоўка-Арэны». Супрацьстаянне намечана на 22 і 23 красавіка 2017 года.