Расея забараніла ўвоз пяці марак сыру з Беларусі

РФ забараніла ўвоз сыра пасля правядзення дзяржаўнага лабараторнага маніторынгу.

Пра гэта гаворыцца ў паведамленні Рассельгаснагляду.

«Паводле вынікаў дзяржаўнага лабараторнага маніторынгу, ажыццёўленага ў пунктах папярэдняга паведамлення «Чырвоная Горка» і «Чырвоны Камень», былі выяўленыя партыі сыроў, якія паступаюць з Рэспублікі Беларусь, якія не адпавядаюць патрабаванням тэхнічных рэгламентаў Мытнага саюза. Аднак вытворцы харчовай прадукцыі не прынялі неабходных мер выпраўлення сітуацыі», — заявілі ў ведамстве.

У выніку Федэральнай службай акрэдытацыі прыпынена дзеянне дэкларацый аб адпаведнасці на малочную прадукцыю.

Рашэнне тычыцца наступных відаў прадукцыі:

сыр «Раубічскі» вытворчасці філіяла ААТ «Рагачоўскі малочнакансервавы камбінат»,

сыр «Тыльзіцер» гэтага ж вытворцы,

сыр «Беларускае золата» вытворчасці «Ашмянскага сыраробнага завода» філіяла ААТ «Лідскі малочна-кансервавы камбінат»,

сыр «Альпійскі» гэтага ж вытворцы,

сыр «Гройцер» вытворчасці Браслаўскага філіяла ААТ «Глыбоцкі малочнакансервавы камбінат».