Мянчанка прапануе жыллё і два гектары зямлі ў вёсцы ў абмен на прадукты

На рынку нерухомасці перыядычна з'яўляецца жыллё, якое гатовыя здаваць за сімвалічную плату і выплату камунальных паслуг.

Пасля шматразовых спроб здаць у арэнду вясковы дом пад Смаргонню мянчанка Таццяна наважылася пайсці на больш радыкальныя захады і кардынальна змяніць умовы: здаць дом практычна дарма. Наўзамен дзяўчына просіць аддаваць ёй частку прадуктаў, якія арандатары змогуць вырасціць на сваёй зямлі. Гэта, вядома, не кватэра ў Менску, але Таццяна спадзяецца, што такая прапанова зможа зацікавіць беларускую сям'ю, піша onliner.by.

Дом, які прапануе Таццяна, знаходзіцца прыкладна ў 130 кіламетрах ад Менска. Акрамя жылой пабудовы, на надзеле ў два гектары ёсць хлеў, летняя кухня і лазня. Таксама Таццяна абяцае арандатарам даць у карыстанне мотаблок, трактар, электрамельніцу і садовы інструмент. «Жыллё, вядома, не новае, але і не развальваецца. Звычайны, даволі дагледжаны вясковы дом», - апісвае жыллё Таццяна.

- Можа, мая прапанова зможа кагосьці выручыць у складанай жыццёвай сітуацыі. Цяпер гаспадарка знікае без гаспадара. Мы спрабавалі здаваць у арэнду, але надоўга людзі не хочуць затрымлівацца ў вёсцы, ды яшчэ і плаціць за арэнду.

Мы шукаем дарослую працавітую сям'ю (ад 28 гадоў), якой будзе цікава развіваць сваю гаспадарку. Мы нават гатовыя ўкласці некаторыя грошы ў развіццё: купіць парася, курэй, магчыма, карову. Калі чалавек хоча пасадзіць гектар бульбы - мы дамо яму для гэтага насенне бульбы, хоча пятрушку - дамо насенне для пятрушкі, хоча зрабіць невялікі сельгасбізнэс - калі ласка, усё ў вашых руках. Ды і тэрыторыя для пашырэння ёсць!

Людзі проста павінны падысці да ўсяго адказна: не ленавацца ўставаць а пятай раніцы, каб пакарміць парсючка або вывесці карову на траўку, увогуле, займацца справай.

Наўзамен мы не папросім грошай за арэнду надзела і дома або часткі выручаных грошай з продажу ўраджаю. Мы толькі хочам браць вырашчаны на нашай зямлі экалагічна чысты прадукт, цёплае хатняе малако і яйкі для свайго стала.

У агенцтве нерухомасці «Твая сталіца» сцвярджаюць, што такія прапановы - вялікая рэдкасць. Аднак на рынку перыядычна з'яўляецца арэнднае жыллё, якое гатовыя здаваць за сімвалічную плату і выплату камунальных аплат. Вядома, такія варыянты часцей за ўсё тычацца рэгіёнаў.