Каваль з Жодзіна папрасіў замяніць яму штраф арыштам
10- 27.03.2017, 15:51
- 10,361
Мужчына хацеў застацца са сваім сынам, прысуджаным да 10 дзён за Дзень Волі.
У судзе Заводскага раёна Менска сёння асудзілі бацьку і сына - Анатоля і Максіма Фралова, паведамляе tut.by.
Фралоў Анатоль Пятровіч, 1964 года нараджэння, каваль з Жодзіна. Артыкул 17.1, суддзя Генадзь Янкоўскі. Фралоў сказаў, што ў яго язвавая хвароба, прасіў спецыяльную ежу, яму не далі, галадаў да суду, і не піў вады. Прапанавалі адваката.
Фралоў: А ён нешта зменіць?
Суддзя: Вось менавіта. Я бачу, што псіхічных захворванняў няма. Вам ваша адукацыя дазваляе абараняць сябе самаго.
Затрыманы растлумачыў, што прыехаў з сынам у Менск пайсці па крамах. Абодвух затрымалі, калі яны былі разам, без тлумачэнняў. У пратаколах напісана, што яны з сынам былі затрыманыя ля розных дамоў - 73 і 83 на праспекце Незалежнасці.
Фралоў прасіў дапытваць міліцыянтаў на паліграфе, суддзя адмовіў.
Сведку маёра Васкевіча дапытвае суддзя.
- Кампанія 15 чалавек, прыцягнула ўвагу, крычалі, шумелі, размахвалі рукамі.
- Што супрацьпраўнага яны зрабілі?
- Крычалі, шумелі, размахвалі рукамі.
- У вашых паказаннях напісана, што ён нецэнзурна лаяўся.
- Пару мацюкоў паміж словамі праскочыла, не болей.
Потым суддзя паказаў на блытаніну ў нумарах дамоў, маёр сказаў, што не з Менска, таму ўсе нумары дамоў не памятае. Але сказаў, што затрымлівалі каля Парку Чэлюскінцаў.
Лейтэнант Андрэй Рагатка наогул назваў нумар дома Незалежнасці 80 і заявіў, што ў натоўпе, які прыцягнуў увагу, было 30 чалавек. Ён сказаў, што затрымалі Фралова каля Акадэміі Навук. На пытанне, у чым было парушэнне Фралова і кампаніі, у якой яго бачылі, лейтэнант адказаў:
- Паводзілі сябе агрэсіўна, нецэнзурна лаяліся.
Суддзя: На каго?
- Можна сказаць, што і на людзей, і на супрацоўнікаў міліцыі.
Суддзя наважыў, што не давяраць паказанням супрацоўнікаў міліцыі няма падстаў, бо не супярэчаць адзін аднаму.
Вердыкт - штраф 10 базавых адзінак з улікам стану здароўя.
Сын, Максім Фралоў, атрымаў 10 дзён. Фралоў-бацька зайшоў да свайго суддзі, прасіў яго перапісаць штраф на арышт, каб быць з сынам, у якога ёсць праблемы з сэрцам.