У NASA прапанавалі стварыць магнітны шчыт для Марса

Ідэя навукоўцаў можа быць рэалізаваная ўжо да 2050 года

Кіраўнік Аддзялення планетных навук NASA Джым Грын прапанаваў стварыць магнітны тунэль, які б дазволіў абараніць Марс ад небяспечнага касмічнага выпраменьвання і спрыяў тэрафармаванню (стварэнню спрыяльнага для жыцця клімату) планеты. Пра сваі ідэі навуковец распавёў на спецыяльнай канферэнцыі, паведамляе The Daily Mail.

Планетолаг прапануе стварыць паміж Сонцам і Марсам магнітны шчыт. Апошні прадстаўляў бы сабой велізарны электрычны дыполь, які генеруе магнітнае поле, дастатковае для абароны Чырвонай планеты ад патокаў зараджаных касмічных часціц. Структура сілавога поля мусіць быць такой, каб Марс апынуўся ўнутры тунэля, сфармаванага сілавымі лініямі ахоўнага поля.

Шчыт павінен стаць у становішча L1 — у пункце Лагранжа на прамой, якая злучае Марс і Сонца. Магнітнае поле, згодна з Грынам, з цягам часу паспрыяе фармаванню атмасферы на Марсе — у старажытнасці блізу 90 адсоткаў яе было знесена ў космас сонечнай радыяцыяй.

Мяркуючы з разлікаў вучонага, ужо праз некалькі гадоў пасля з'яўлення ахоўнага поля атмасферны ціск на Марсе можа дасягнуць паловы ад такога на Зямлі. Гэта адбудзецца праз парніковы эфект, у выніку якога пачнуць раставаць палярныя шапкі і, магчыма, за некалькі сотняў мільёнаў гадоў растане сёмая частка акіянаў планеты. Ідэя вучонага, на ягоную думку, можа быць рэалізаваная ўжо да 2050 года.