Хто выводзіць грошы з Беларусі

Замежныя кампаніі масава сыходзяць з краіны.

У першым квартале гэтага года колькасць прадстаўніцтваў замежных кампаній і арганізацый, што закрыліся ў 1,7 разы перавысіла колькасць тых, што атрымалі дазвол беларускага МЗС на працу.

Гэта яшчэ адно сведчанне ўзроўню «дзелавой актыўнасці» ў нацыянальнай эканоміцы, піша «Заўтра тваёй краіны».

У першым квартале 2017 года МЗС выдала дазволы на адкрыццё прадстаўніцтваў 27 структурам. Традыцыйна больш за ўсё задаволеных запытаў было з боку расейскіх кампаній – 14.

Многія расейскія кампаніі, якія захацелі адкрыць прадстаўніцтва ў Беларусі, звязаныя з узвядзеннем Беларускай АЭС.

Адабрэнне беларускага знешнепалітычнага ведамства атрымалі таксама кампаніі з Літвы, Кітая, Польшчы, Швейцарыі, Швецыі, Вугоршчыны, Сінгапура і Украіны, а ў іх ліку Кітайская міжнародная машынабудаўнічая карпарацыя, шведскі вытворца тэхнікі для лясной гаспадаркі Vimek і іншыя.

Кампаній, што пакінулі беларускі рынак, было ў 1,7 разы больш – 46. Тут лідзіруюць – расейцы (15 кампаній) і літоўцы (7). Усяго ў гэтым спісе прадстаўнікі 18 краін.

Сярод самых вядомых кампаній, якія закрылі прадстаўніцтва ў гэтым годзе, чыгуначны перавозчык Нацыянальная кампанія «Казакстан тэмір жалы» і італьянская будаўнічая карпарацыя Todini Costruzioni Generali. Італьянцы мелі ў Беларусі замову на рэканструкцыю адной з аўтамабільных дарог.

У спісе закрытых фігуруе і прадстаўніцтва эмірацкай кампаніі Riyada Investment. У 2013 годзе Лукашэнка падчас свайго візіту ў Сінгапур сустрэўся з прэзідэнтам Riyada Group і Riyada Investment Шэйхай Дзеей бінт Ібрахім Аль-Халіфай.

Кіраўнік буйной інвестыцыйнай кампаніі, якая працуе на рынках краін Персідскага заліва і Блізкага Усходу, і беларускі лідар дамовіліся аб сумеснай дзейнасці ў гэтым рэгіёне. У 2013 годзе было зарэгістравана сумеснае прадпрыемства Riyada PAL Awali ў Бахрэйне. На сайце групы, гаворыцца пра яе ўдзеле ў лізінгавых праграмах для БелАЗа, МАЗа і МАЗ-МАНа.

«Задумы ў нас вельмі маштабныя, калі ўсё атрымаецца, то гэта будзе сапраўдны прарыў», - казаў паводле вынікаў сустрэчы з кіраўніком Riyada Group Лукашэнка.