Што вядома аб будучым судзе над Януковічам
7- 12.04.2017, 16:11
- 19,948
Суд Кіева 4 траўня пачне слуханне справы, у якой у якасці абвінавачанага ў дзяржаўнай здрадзе праходзіць беглы экс-прэзідэнт Украіны.
Абалонскі раённы суд Кіева ў аўторак, 11 красавіка, паведаміў, што пачатак працэсу ў справе аб дзяржаўнай здрадзе экс-прэзідэнта Украіны Віктара Януковіча прызначаны на 4 траўня. Абвінаваўчыя высновы вайсковая пракуратура перадала ў суд яшчэ 14 сакавіка, піша «Нямецкая хваля».
У чым абвінавачваюць Януковіча?
Экс-прэзідэнта Віктара Януковіча абвінавачваюць у дзяржаўнай здрадзе, у дапамаганні пры наўмысных дзеяннях, учыненых з мэтай змянення межаў тэрыторыі і дзяржмяжы Украіны, а таксама ў дапамаганні вядзенню агрэсіўнай вайны.
Як паведамляецца на сайце Генеральнай пракуратуры Украіны, Януковіч «учыніў дзяржаўную здраду...з мэтай садзейнічання Расейскай Федэрацыі і яе прадстаўнікам у парушэнні суверэнітэту і тэрытарыяльнай цэласнасці Украіны ў надзеі атрымаць падтрымку і абарону ад прадстаўнікоў улады Расейскай Федэрацыі для наступнага працяглага пражывання на тэрыторыі гэтай краіны і пазбягання крымінальнай адказнасці ва Украіне».
Якое пакаранне пагражае экс-прэзідэнту
Дзяржаўная здрада ва Украіне караецца пазбаўленнем волі на тэрмін ад 10 да 15 гадоў. Такі ж тэрмін пагражае за дапамаганне вядзенню агрэсіўнай вайны або агрэсіўных ваенных дзеянняў.
Якая довадная база
Ключавымі довадамі, на думку абвінавачвання, з'яўляюцца лісты Віктара Януковіча расейскаму калегу Уладзіміру Пуціну і ў Савет Федэрацыі РФ з просьбай аб увядзенні войскаў ва Украіну. Як паведамляў раней генпракурор Юрый Луцэнка, у распараджэнні вайсковай пракуратуры ёсць завераная сакратарыятам ААН копія ліста-заявы Януковіча Пуціну, якую на пасяджэнні Рады бяспекі ААН 3 сакавіка 2014 года прадэманстраваў прадстаўнік РФ Віталь Чуркін.
Сярод іншых довадаў, са слоў пракурора галоўнай вайсковай пракуратуры Руслана Краўчанкі, - заявы сведак, рэчавыя довады, дакументы, высновы экпэртаў, відэа- і фотадовады.
Хто сведкі
Паводле справы апытаныя больш за 100 сведак. Адным з іх быў і экс-дэпутат Дзярждумы Дзяніс Вараненкаў, якога ў сакавіку кілер расстраляў у цэнтры Кіева. Са слоў Краўчанкі, Вараненкаў быў такім жа важным сведкам, як і астатнія, так што ягонае забойства не паўплывае на перспектывы працэсу.
Хто будзе судзіць экс-прэзідэнта
Справу аб дзяржаўнай здрадзе былога прэзідэнта Януковіча будуць разглядаць тыя ж суддзі, якія судзілі экс-байцоў батальёна «Тарнада», - Уладзіслаў Дзявятка, Дзмітрый Камбулаў і Максім Цітоў. Генеральную пракуратуру будзе прадстаўляць у судзе вайсковы пракурор Руслан Краўчанка.
Якая пазіцыя абароны Януковіча
Абарона Януковіча мяркуе, што перадача справы аб дзяржаўнай здрадзе экс-прэзідэнта ў суд з'яўляецца незаконнай. Са слоў адваката Віталя Сердзюка, для разгляду справы няма ніякіх прававых падстаў, бо Януковічу не ўручылі пастанову аб прыцягненні ў якасці падазраванага.
У лістападзе 2016 года Юрый Луцэнка падчас відэадопыту вусна абвясціў Януковічу аб тым, што ў дачыненні да яго выстаўленае падазрэнне, пісьмовае ж паведамленне экс-прэзідэнту так і не было ўручанае. Раней Сярдзюк таксама казаў, што абарона зафіксавала шматлікія працэсуальныя парушэнні, якія будуць выкладзеныя пры далейшым магчымым разглядзе справы ў Еўрапейскім судзе ў правах чалавека.
Паводле якіх яшчэ спраў праходзіць беглы прэзідэнт
Віктар Януковіч фігуруе ў некалькіх крымінальных справах ва Украіне. Сярод іх справа аб ужыванні залішніх сілавых метадаў, спецсродкаў і агнястрэльнай зброі ў дачыненні да ўдзельнікаў масавых акцый пратэсту на Майдане з лістапада 2013 года да лютага 2014 года.
Ёсць яшчэ справа аб стварэнні злачыннай арганізацыі - тут Януковіча падазраюць у стварэнні такой арганізацыі з мэтай учынення цяжкага злачынства, а таксама ў кіраўніцтве ім. Акрамя таго, экс-прэзідэнт праходзіць як падазраваны паводле «справы Межыгор'я» і «справы Укртэлекаму» (аб незаконным завалоданні 220 мільёнамі грыўняў з дзяржбюджэту, прызначанымі для сістэмы ўрадавай сувязі).