«Першы ў свеце трыльянер з'явіцца ў сферы штучнага інтэлекту»

У Менску прайшоў дзелавы форум «Пад знакам непрадказальнасці».

«Сапраўдныя грошы ў сферы штучнага інтэлекту з'явяцца толькі тады, калі гэта пойдзе ў рэальны сектар», — заявіў інвестар і заснавальнік дадатку Fabby Юрый Мельнічак у рамках дзелавога форуму «Пад знакам непрадказальнасці», арганізаваным «Пра бізнэс». Падчас дыскусіі з нагоды ўзаемадзеяння штучнага інтэлекту і бізнэсу экспэрты абмеркавалі магчымыя змены на рынку працы і да чаго варта прыстасоўвацца ўжо сёння, піша tut.by.

З самага пачатку абмеркавання Юрый Мельнічак наважыў развеяць памылкі пра паняцці штучнага інтэлекту. «Калі кажуць «штучны інтэлект», звычайна маецца на ўвазе моцны штучны інтэлект, дзе машына вучыцца думаць. І пакуль, на жаль, ці на шчасце, мы вельмі далёкія ад гэтага. Сёння штучны інтэлект — гэта, фактычна, машыннае навучанне, у якога інтэлекту няма. І працу, якая патрабуе менавіта інтэлекту, пакуль нават блізка незразумела, як аўтаматызаваць», — супакоіў Мельнічак.

Але ў тым, што ў апошняе дзесяцігоддзе адбылася эвалюцыя ў сферы нейронавых сетак, сумнявацца не варта. Сапраўднага прагрэсу галіна дамаглася ў аналізе відэа, працы з вялікімі звесткамі і з'яўлення карэляцыі. «Самае цікавае, што гэты прарыў у галіне нейрасеціва, ён адкрыты, яго можна браць і выкарыстоўваць бясплатна. Для распрацоўнікаў гэта можа стаць своеасаблівымі кубікамі, якія можна дадаваць у свае праекты», — прапанаваў заснавальнік Fabby.

Як заўважыў заснавальнік інвестыцыйнага фонду VP Capital Віктар Пракапеня, ужо ўклаў грошы ў машыннае навучанне, «першы ў свеце трыльянер з'явіцца ў сферы штучнага інтэлекту». Але спікеры мяркуюць, што найбольш важна прыстасавацца да таго, што машынны інтэлект становіцца раўнапраўным партнёрам. І пакуль чалавек будзе наладжваць сабе ўжо іншыя функцыі, неабходна навучыцца дэлегаваць да штучнага інтэлекту, навучыцца з ім узаемадзейнічаць.

«Да тэхналогіяў не трэба мець страху, лепш падтрымліваць у сябе аптымізм. Неабходна будаваць свае канкурэнтныя перавагі на аснове таго, што цяпер прапануе ІТ. І тыя, хто павольна адаптуюцца, будуць працягваць прайграваць, а тыя, хто хутка, будуць больш багацця сабе забіраць», — тлумачыць экспэрт.

Аднак, на думку Пракапені, яшчэ нельга сказаць, якія прафесіі паглыне штучны інтэлект, а якія пакіне.

«Але ў будучыні штосьці здарыцца з сярэднім класам. Будзе ўсё больш людзей багатых, і будзе ўсё больш людзей бедных, — упэўнены інвестар. — Многія думаюць, як будзе выглядаць свет, дзе будуць працаваць толькі 10% насельніцтва. Але гэта адбываецца ўжо цяпер. Да прыкладу, Трамп прапануе пабудаваць сцяну на мяжы з Мексікай, каб мексіканцы не забіралі працу ў амерыканцаў. Думаю, мексіканцы хутка будуць канкураваць з машынным навучаннем».

Мадэратар дыскусіі вырашыў даведацца ў старэйшага партнёра юрыдычнай фірмы «Алейнікаў і партнёры» Дзяніса Алейнікава, як цяпер машынны інтэлект і нейронавыя сеткі палягчаюць працу юрыстам. Алейнікаў расказаў, што ўжо ёсць праграма ад амерыканскага банка J. P. Morgan, якая эканоміць блізу 380 тыс. гадзін «папяровай цяганіны». Існуе таксама праграма, здольная выявіць праблемныя моманты ў дакументах, і чатбот, якія аспрэчваюць парковачныя штрафы. Але Алейнікаў упэўнены, што працу на ўзроўні мыслення юрыдычных спецыялістаў і такія якасці, як добрасумленнасць, разумнасць і справядлівасць, штучны інтэлект ніколі не зможа замяніць.

«Штучны інтэлект вельмі падобны на расклад авіярэйсаў, па якім можна даведацца, па якіх кірунках ёсць магчымасць паляцець. Але ён не падкажа, куды менавіта вам трэба ляцець. Гэта адрозненне ніколі не будзе пераадолена», — рэзюмаваў экспэрт. А Пракапеня пацвердзіў: «Юрысты ў Беларусі патрэбныя яшчэ любому бізнэсу».

Зрэшты, новыя тэхналогіі хутчэй даюць працу юрыстам, чым адбіраюць яе. Каля двух месяцаў таму Еўрапарламент прыняў рэзалюцыю ў пытаннях робататэхнікі і штучнага інтэлекту. І там быў уведзены такі тэрмін, як «электронная асоба», які залічвае ў асаблівую катэгорыю робатаў, якія працуюць на аснове нейронавых сетак і здольныя да аўтаномным дзеянняў і саманавучання. Паводле версіі Еўрапарламента, яны павінны мець грамадзянскія правы і часткова несці адказнасць за прычыненую шкоду. Еўразвяз прапануе, каб вытворцы стваралі гарантыйны фонд, з якога будзе выплачвацца шкода, і страхавалася адказнасць робатаў. Паралельна з гэтым у Расеі падрыхтаваны праект «закона Грышына» — старшыні Савета дырэктараў Mail.ru Андрэя Грышына, — які ўсталёўвае асаблівую адзінку грамадзянскага права «робат-агент» і дае яму прававы статус юрыдычнай асобы.

«Закон Грышына» прапануе зрабіць робата ўдзельнікам грамадзянскага абароту ад свайго імя, і даць яму магчымасць прадстаўляць камерцыйныя інтарэсы вытворцы як хадзячая інтэлектуальная даверанасць», — дадае Алейнікаў. Аднак юрыст непакоіцца, што праз здольнасць да саманавучання праблематычна будзе зразумець, каму менавіта варта несці адказнасць за прычыненую робатам шкоду.