Джамала: У Naviband ёсць энэргія, эмоцыя, пазітыў, у які яны вераць
- 15.04.2017, 13:40
- 15,093
Беларусы маюць усе шанцы на перамогу на «Эўравізіі–2017».
19 красавіка ў віленскай канцэртнай зале Compensa выступіць пераможца «Эўравізіі–2016» Джамала. Вялікі сольны канцэрт стане паўнавартаснай абкаткай новай праграмы «I Believe in U», якую спявачка прэзентуе 12 траўня ў Кіеве, а потым павязе ў ЗША, паведамляе «Эўрарадыё».
У межах канцэрту ў Вільні, куды запрашаюцца беларускія прыхільнікі, Джамала выканае песні з альбома «1944», які летась выпусціла кампанія Universal, а таксама найлепшыя песні. Суправаджацца шоу будзе ўражлівай відэапраекцыяй.
Джамала перамагла на «Эўравізіі–2016» з песняй «1944» пра дэпартацыю крымскіх татараў, якую праспявала на ангельскай і крымска-татарскай мовах. Паводле словаў спявачкі, перамагчы на конкурсе можна з песняй на любой мове. І ў цяперашніх прадстаўнікоў Беларусі на «Эўравізіі» Naviband ёсць для гэтага ўсе шанцы:
«Naviband – вельмі мілыя, яны робяць музыку ў сваім настроі, у сваім духу. Мне здаецца, няма правіла для перамогі. Але перамога дакладна немагчымая без неверагоднай харызмы і груву, якія павінны быць і ў песні, і ў выканаўцу. У Naviband ёсць менавіта тое, што прымушае іх слухаць – гэта энэргія, эмоцыя, пазітыў, у які яны вераць», – мяркуе спявачка.